Foraktin

Dərman vasitəsinin istifadəsi üzrə təlimat (xəstələr üçün)

FORAKTİN  daxilə qəbul edilən məhlul hazırlamaq üçün toz
FORACTİN®

Beynəlxalq patentləşdirilməmiş adı: Macrogol

Tərkibi
Təsiredici maddə:   1 ədəd paketin içərisində 64,0 q makroqol 4000 vardır.
Köməkçi maddələr: kalium xlorid,  natrium xlorid, susuz natrium sulfat,
natrium hidrokarbonat, natrium saxarin.

Təsviri
Ağ rəngli tozdur. Hazırlanan məhlul şəffaf mayedir, rəngsiz və qoxusuzdur.

Farmakoterapevtik qrupu
Qəbizlik əleyhinə vasitələr. Osmotik yumşaldıcılar. Makroqol.
ATC kodu: A06AD65.

Farmakoloji xüsusiyyətləri
Farmakodinamikası
Preparat, tərkibində Makroqol 4000 və elektrolitlər (sodium, kalium, bikarbonat və xloridlər) olan osmotik qəbizlik əleyhinə vasitədir.
Yüksək molekulyar çəkili Makroqol 4000, hidrogen rabitələri ilə su molekullarını saxlaya bilən uzun xətti polimerdir. Daxilə qəbul edildikdən sonra dərman bağırsaqdakı mayenin həcmini artırır. Bağırsaqda absorbsiya olunmamış mayenin həcmi, dərman məhlulunun qəbizlik əleyhinə  təsirini təmin edir. Preparatın tərkibində olan elektrolitlər qan plazmasının təsirini qoruyur.
Farmakokinetikası
Yüksək molekulyar kütləyə malik olduğuna görə makroqol 4000 ağızdan qəbul edildikdən sonra mədə-bağırsaq traktında sorulmur və metabolizmə uğramır. Dəyişilməmiş halda bağırsaq vasitəsilə xaric olunur.
Məhlulda olan elektrolitlərin tərkibi elə balanslaşdırılıb ki, bağırsaq və plazma arasında elektrolit mübadiləsi praktiki olaraq sıfır hesab edilə bilər.

İstifadəsinə göstərişlər

• Yoğun bağırsağın endoskopik və ya rentgenoloji müayinəyə hazırlığı
• Yoğun bağırsağın cərrahi müdaxiləyə hazırlığı

Əks göstərişlər

• Preparatın istənilən komponentinə qarşı həssaslıq
• Orqanizmin susuzlaşması və ya ağır ürək çatışmazlığı
• Xərçəng (karsinoma) və ya selikli qişanın ciddi zədələnməsi ilə müşayiət olunan digər bağırsaq xəstəliyi
• Bağırsaq keçməzliyi
• Həzm sisteminin perforasiyası və ya perforasiya riski
• Mədənin boşalmasının pozulması (məsələn, qastroparez)
• Toksik kolit və ya toksik meqakolon
• 18 yaşdan kiçik uşaqlar  

Xüsusi göstərişlər və ehtiyat tədbirləri
Preparatın qəbulu nəticəsində yaranan diareya eyni vaxtda qəbul edilən dərmanların sorulması prosesini əhəmiyyətli dərəcədə poza bilər. Preparatın qəbulunun ilk saatlarında  ürəkbulanma, qusma və qarında köp müşahidə oluna bilər, lakin bunlar davamlı istifadə zamanı adətən keçib gedir. Çox nadir hallarda preparatın tərkibindəki polietilenqlikola (makroqol) görə allergik reaksiya (anafilaktik şok, səpgi, angioödem) müşahidə oluna bilər. Polietilenqlikola qarşı yüksək həssaslığı olan şəxslərə bu dərmanın təyin edilməsi məsləhət görülmür.
Preparatın izotonik tərkibinə görə elektrolit pozuntuları gözlənilmir, lakin belə risklər barədə xəstələr xəbərdar edilməlidir. Bu preparat böyrək funksiyası pozulmuş, ürək çatışmazlığı olan və ya diuretik (sidikqovucu) dərmanlar qəbul edən xəstələrdə, yəni su-elektrolit balansı pozulmasına meyilli şəxslərdə ehtiyatla istifadə olunmalıdır. Belə hallarda tibbi nəzarət vacibdir.
Aspirasiya (qida və ya mayenin nəfəs yollarına düşməsi) riski olan xəstələrdə – məsələn, yataq xəstələri, nevroloji və ya hərəkət pozuntuları olanlarda – preparat aspirasion pnevmoniya riski səbəbindən yalnız tibbi nəzarətlə və ehtiyatla istifadə olunmalıdır. Bu zaman preparat oturaq vəziyyətdə və ya nazal zondla (burundan boru ilə) verilməlidir. Ürək və böyrək çatışmazlığı olan xəstələrdə natrium yüklənməsi səbəbindən ağciyərlərin kəskin ödemi (şişməsi) riski mövcuddur.
Preparatın bir paketində 1,967 qram natrium var – bu, duz qəbulunu məhdudlaşdıran pəhrizdə olan xəstələr üçün nəzərə alınmalıdır.
İşemik kolit
Bağırsağın müayinəsinə hazırlıq məqsədilə makroqol tərkibli dərmanlardan istifadə zamanı, ağır hallar da daxil olmaqla işemik kolitin inkişafı barədə məlumatlar əldə edilmişdir.
Makroqol, işemik kolit inkişafı üçün risk amilləri olan pasiyentlərdə və ya stimulyasiyaedici təsirə malik işlədici vasitələrlə (məsələn, bisakodil və ya natrium pikosulfat) birgə istifadə zamanı ehtiyatla təyin edilməlidir. Qəfil qarın ağrısı, düz bağırsaqdan qanaxma və ya işemik kolitə uyğun digər simptomlar müşahidə olunan pasiyentlər dərhal tibbi qiymətləndirilməlidirlər.

Digər dərman vasitələri ilə qarşılıqlı təsiri
Preparat təyin edilməzdən əvvəl həkim, xəstənin qəbul etdiyi bütün peroral (ağızdan) dərmanlar barədə məlumat almalıdır. Preparatın istifadəsi nəticəsində yaranan ishal, eyni vaxtda ağızdan qəbul edilən digər dərmanların sorulmasına  mane ola bilər. Bu səbəbdən preparat  digər dərmanların qəbulundan ən azı 2 saat sonra qəbul olunmalıdır. Bağırsaq təmizləyici vasitə ilə müayinə prosesi tam başa çatana qədər digər dərmanların qəbulundan çəkinmək tövsiyə olunur. Xüsusilə, terapevtik diapazonu dar və yarımparçalanma müddəti  qısa olan preparatların təsiri əhəmiyyətli dərəcədə azala bilər.

Hamiləlik və laktasiya dövründə istifadəsi
Fertillik  
Heyvanlar üzərində aparılmış tədqiqatlar, dərmanın reproduktiv toksikliyini qiymətləndirmək üçün kifayət deyil.
Hamiləlik
Makroqolun hamilə qadınlarda istifadəsinə dair məlumatlar məhduddur. Preparat yalnız hamiləlik zamanı istifadəsinin faydası mümkün riskdən çox olduqda istifadə olunmalıdır.
Laktasiya
Preparatın südvermə  dövründə istifadəsinə dair məlumatlar məhduddur. Makroqol 4000-in ana südünə keçib-keçmədiyi məlum deyil.
Yeni doğulmuş və ya körpələrdə risk tam istisna edilə bilməz. Bu səbəbdən, preparatın yalnız  istifadəsinin faydası mümkün riskdən yüksək olduqda laktasiya dövründə qəbul edilməlidir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Preparatın avtomobil idarə etmə və ya digər mexanizmlərlə işləməyə təsirini öyrənmək məqsədilə heç bir tədqiqat aparılmamışdır.

İstifadə qaydası və dozası
Preparat yalnız böyüklərə daxilə, peroral (ağız yolu ilə) təyin olunur.
Məhlul birbaşa istifadə ərəfəsində hazırlanmalıdır. Bir paket preparatın tərkibi 1 litr suya tədricən əlavə edilir və bərabər qarışdırılır.
Tövsiyə olunan doza:
Məhlul ayrı-ayrı qurtumlarla, hər 15 dəqiqədə bir stəkan olmaqla qəbul olunur – 1 saat ərzində 1 litr məhlul içilməlidir.
Doza xəstənin bədən çəkisinə uyğun hesablanır – 15–20 kq çəkiyə 1 litr məhlul (təxminən 3–4 litr ümumi həcm).
Dozalanma rejimi
Preparat iki müxtəlif sxem üzrə qəbul edilə bilər:
Bir mərhələli hazırlıq: 3-4 litr məhlul axşam saatlarında, müayinə və ya əməliyyatdan bir gün əvvəl qəbul olunur (əgər prosedur səhər planlaşdırılıbsa).
İki mərhələli hazırlıq: 2-3 litr məhlul axşam, qalan hissəsi isə səhər saatlarında qəbul olunur. Qəbul prosedurdan 3-4 saat əvvəl tamamlana bilər.
Preparatın qəbul sxemini müalicə edən həkim, xəstənin klinik vəziyyətinə və mümkün fəsadların riskinə əsasən tövsiyə edə bilər. Preparatın qəbulundan 2–3 saat əvvəl və müayinə tamamlanana qədər xəstələrə bərk qida qəbul etməmək tövsiyə olunur.
Böyrək çatışmazlığı olan xəstələr:
Bu pasiyent qrupu üçün preparatın istifadəsinə dair məlumat məhduddur.
Uşaqlar:
18 yaşına qədər olan uşaqlarda preparatın təhlükəsizliyi və effektivliyi öyrənilməmişdir.

Əlavə təsirləri
Preparatın qəbulunun əvvəlində, adətən qəbul davam etdikcə keçən, ürəkbulanma və qusma halları müşahidə edilmişdir.
Əks təsirlər haqqında məlumat sistem-orqan siniflərinə və başvermə tezliyinə uyğun olaraq təqdim olunur. Tezlik kateqoriyaları: çox tez-tez (≥1/10), tez-tez (≥1/100, lakin <1/10), bəzən (≥1/1000, lakin <1/100), nadir (≥1/10000, lakin <1/1000), çox nadir (<1/10000), tezliyi naməlumdur (mövcud məlumatlara əsasən tezlik dəyərləndirilə bilmir).
İmmun sistem pozuntuları: tezliyi naməlum – yüksək həssaslıq (anafilaktik şok, angioödem, səpgi, qaşınma, övrə).
Həzm sistemi pozuntuları: çox tez-tez – ürəkbulanma, qarın ağrısı, qarında köp, tez-tez – qusma.

Doza həddinin aşılması
Dərman vasitəsinin doza həddinin aşılması halları qeydə alınmamışdır. Bununla belə, preparatın doza həddindən artıq istifadəsi nəticəsində xəstələrdə şiddətli ishal inkişaf edərsə, su-elektrolit balansı və hidratasiya səviyyəsi nəzarətdə saxlanılmalıdır.

Buraxılış forması
Dərman vasitəsi, 73,69 q  toz alüminium folqa ilə laminasiya edilmiş saşelərdə. 4 ədəd saşe içlik vərəqə ilə birlikdə karton qutuya qablaşdırılır.

Saxlanma şəraiti
25°C-dən aşağı otaq temperaturunda,  uşaqların əli çatmayan yerdə saxlamaq lazımdır.

Yararlılıq müddəti
2 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Reseptsiz  buraxılır.

İstehsalçı / Qeydiyyat vəsiqəsinin sahibi
Republican Production Unitary Enterprise “ACADEMPHARM”, Republic of Belarus
2220141, Minsk, st. Akademika Kuprevicha, 5, bldg. 3, Rooms 1-9, 11-13, 16, 17, Bldg. 4, Republic of Belarus