Depam

Dərman vasitəsinin istifadəsi üzrə təlimat (xəstələr üçün)

DEPAM            5 mq/2,5 ml; 10 mq/2,5 ml rektal məhlul
DEPAM

Beynəlxalq patentləşdirilməmiş adı: Diazepam

Tərkibi
Təsiredici maddə:   2,5 ml məhlulun tərkibində 5 mq və ya 10 mq diazepam vardır.
Köməkçi maddələr: benzil spirti, etanol 96%, propilenqlikol, natrium benzoat (E211), pH-in
tənzimlənməsi üçün 10% xlorid turşusu, təmizlənmiş su.

Təsviri
Düz bağırsağa istifadə üçün flakonlarda olan şəffaf, rəngsiz və ya açıq sarı, yapışqan (viskoz) mayedir.

Farmakoterapevtik qrupu
Anksiolitiklər. Benzodiazepin törəmələri.
ATC kodu: N05BA01.

Farmakoloji xüsusiyyətləri
Farmakodinamikası
Diazepam, gərginlik, həyəcan və narahatlığı azaltmaq xüsusiyyətləri ilə seçilən, eyni zamanda sakitləşdirici (sedativ) və yuxugətirici (hipnotik) təsirlərə malik olan 1,4-benzodiazepinlər sinfinə aid psixotrop maddədir. Bundan əlavə, diazepam əzələ boşaldıcı (miorelaksant) və antikonvulsiv (qıcolma əleyhinə) təsir göstərir. Diazepam qısa müddətli narahatlıq və gərginlik hallarında, sedativ və premedikasiya məqsədilə, əzələ spazmlarının aradan qaldırılmasında və alkoqol asılılığından çıxış simptomlarının müalicəsində istifadə olunur.
Diazepam mərkəzi sinir sistemi və bəzi periferik orqanlarda yerləşən spesifik reseptorlara birləşir. Mərkəzi sinir sistemindəki benzodiazepin reseptorları GABA-ergik neyromediator sistemi reseptorları ilə funksional cəhətdən sıx əlaqəlidir. Diazepam bu reseptorlara bağlandıqdan sonra GABA-ergik ötürmənin inhibəedici (sakitləşdirici) təsirini gücləndirir.
Farmakokinetikası
Absorbsiyası
Rektal istifadəsindən sonra diazepam düz bağırsaqdan sürətlə və demək olar ki, tam şəkildə sorulur. Terapevtik təsirin başlanğıcı bir neçə dəqiqə ərzində baş verir. Rektal istifadəsindən  sonra qanda diazepamın səviyyəsinin sürətlə yüksəlməsi, təxminən venadaxili dozadan sonra müşahidə olunan sürətə uyğundur, lakin pik plazma konsentrasiyası rektal istifadəsindən  sonra venadaxili istifadə nisbətən daha aşağı olur.
Böyüklərdə 10 mq-lıq diazepamın rektal məhlul şəklində istifadəsindən sonra maksimal plazma konsentrasiyası təxminən 10–30 dəqiqə ərzində əldə olunur (təxminən 150–400 nq/ml).
Paylanması
Diazepam yüksək dərəcədə zülallara birləşir (95-99%). Paylanma həcmi yaşdan asılı olaraq 0,95-2 l/kq arasında dəyişir. Diazepam lipofil xassəli olub sürətlə serebrospinal mayeyə keçir. Diazepam və onun əsas metaboliti olan N-desmetildiazepam (nordiazepam) plasentadan keçir və ana südü ilə ifraz olunur.
Biotransformasiyası
Diazepam əsasən qaraciyərdə metabolizə olunur. Onun metabolitləri — N-desmetildiazepam (nordiazepam), temazepam və oksazepam — sidikdə qlükuronidlər şəklində aşkarlanır və farmakoloji aktiv maddələrdir. İlk 72 saat ərzində bu metabolitlərin yalnız 20%-i sidikdə müəyyən olunur.
Diazepam iki fazalı yarımparçalanma dövrünə malikdir: əvvəlcə sürətli paylanma fazası, daha sonra isə 1-2 gün davam edən uzunmüddətli eliminasiya fazası baş verir.
Aktiv metabolitlər üçün yarımparçalanma dövrləri təxminən belədir: N-desmetildiazepam: 30-100 saat, Temazepam: 10-20 saat, Oksazepam: 5-15 saat.
Eliminasiyası      
Yenidoğulmuşlarda diazepamın metabolizmi və eliminasiya prosesi uşaqlara və böyüklərə nisbətən xeyli yavaşdır. Yaşlı pasiyentlərdə eliminasiya 2–4 dəfə uzanır. Böyrək funksiyası pozulmuş pasiyentlərdə də eliminasiya müddəti uzanır. Qaraciyər patologiyası (sirroz, hepatit) olan pasiyentlərdə eliminasiya 2 dəfə uzun müddət davam edir. Ümumilikdə eliminasiya yaşdan, qaraciyər və böyrək funksiyasından asılıdır.
Pasiyentlərin xarakteristikası
Qaraciyər/Böyrək çatışmazlığı
Böyrək çatışmazlığı olan pasiyentlərdə diazepamın eliminasiya müddəti uzanır. Qaraciyər xəstəlikləri (sirroz, hepatit) zamanı eliminasiya təxminən 2 dəfə uzanır.
Yaş
Yenidoğulmuşlarda metabolizm və eliminasiya prosesləri uşaqlara və böyüklərə nisbətən daha ləng gedir. Yaşlı pasiyentlərdə eliminasiya 2-4 dəfə daha uzun çəkir.

İstifadəsinə göstərişlər
Epileptik və qızdırma ilə müşayiət olunan qıcolmalarda, tetanus nəticəsində yaranan əzələ spazmını aradan qaldırmaq üçün, kiçik cərrahi və stomatoloji prosedurlarda sedativ olaraq, habelə kəskin narahatlıq, təşviş  və həyəcan  pozğunluqlarında ilkin müalicə kimi istifadə olunur. İntravenoz inyeksiya mümkün və ya məqsədəuyğun olmadıqda, tez təsir göstərməsi tələb olunan hallarda rektal istifadə tövsiyə olunur. Xüsusilə uşaqlarda qıcolmaların təcili müalicəsində faydalı ola bilər.

Əks göstərişlər  
Diazepam, benzodiazepinlərə və ya tərkibindəki hər hansı köməkçi maddəyə qarşı həssaslıq olduqda, depressiya və təşviş hallarında, xüsusilə yalnız depressiya diaqnozu ilə olan pasiyentlərdə (intihar riski səbəbindən) monoterapiya kimi, miasteniya qravis xəstəliyində, kəskin tənəffüs çatışmazlığı olan şəxslərdə, yuxu apnoe sindromunda, ağır qaraciyər çatışmazlığında, vaxtından əvvəl doğulmuş körpələrdə (benzil spirti tərkibinə görə) və  hamilələrdə əks göstərişdir.

Xüsusi göstərişlər və ehtiyat tədbirləri
Böyrək və ya qaraciyər funksiyası pozulmuş, xroniki ağciyər çatışmazlığı, porfiriya, dar bucaqlı qlaukoma, üzvi beyin dəyişiklikləri (xüsusilə arterioskleroz) olan pasiyentlərdə ehtiyatla istifadə olunmalıdır. Mərkəzi sinir sisteminə təsir edən digər dərmanların təsirini artıra bilər və onlarla eyni vaxtda istifadə olunmamalıdır. Benzodiazepinlərlə birgə istifadə amneziya (yaddaş itkisi) ilə əlaqəli ola bilər və psixoloji uyğunlaşma lazım olduğuna görə, yas və kədər hallarında diazepam istifadə edilməməlidir. Psixotik pozğunluqların ilkin müalicəsi üçün tövsiyə edilmir. Fobik və obsessiv hallarda, eləcə də depressiya və ya depressiya ilə əlaqəli təşvişin müalicəsində təkbaşına istifadə olunmamalıdır, çünki bu pasiyent qrupunda intihar riski yarana bilər. Anamnezində alkoqol və ya narkotik maddə asılılığı olan pasiyentlərdə ehtiyatla istifadə olunmalıdır. Digər benzodiazepinlərdə olduğu kimi, şəxsiyyət pozğunluğu olan pasiyentlərə diazepam təyin edilərkən son dərəcə ehtiyatlı olunmalıdır. Uşaqlara diqqətli qiymətləndirmə aparılmadan verilməməlidir. Müalicə müddəti mümkün qədər qısa saxlanmalıdır. Yaşlı və zəif düşmüş pasiyentlərə daha aşağı dozalar verilməlidir, çünki onlar benzodiazepinlərin mərkəzi sinir sisteminə təsirinə daha həssasdırlar. Kəskin tənəffüs çatışmazlığı olan pasiyentlərə aşağı dozalar tövsiyə olunur. Ensefalopatiya səbəbilə ağır qaraciyər çatışmazlığı olan pasiyentlərdə istifadəsi tövsiyə olunmur. Qısa müddətli istifadədə asılılıq riski aşağıdır. Qısa müddətli terapevtik dozada istifadədən sonra belə, benzodiazepinlərdə kəsilmə simptomları baş verə bilər: baş ağrısı, əzələ ağrısı, güclü təşviş, gərginlik, narahatlıq və əsəbilik. Ağır hallarda bu simptomlar müşahidə oluna bilər: reallıqdan uzaqlaşma, şəxsiyyətin itirilməsi, səslərə həssaslıq, ətraflarda keylik və iynələnmə, işığa, səsə və toxunuşa qarşı həssaslıq, hallüsinasiyalar və ya epileptik qıcolmalar. Bu hallar bir neçə gündən artıq müddət müalicə edilən pasiyentlərdə nəzərə alınmalıdır. Müalicənin qəfil dayandırılması  anamnezində  epilepsiya və ya qıcolma olan pasiyentlərdə qıcolma və ya epileptik statusa səbəb ola bilər. Müalicə qəfil dayandırıldıqda alkoqol və ya narkotik maddə asılılığı olan pasiyentlərdə də qıcolmalar müşahidə oluna bilər.
Geri qayıdan yuxusuzluq və təşviş: benzodiazepinlərlə müalicəyə səbəb olan simptomların müalicənin dayandırılmasından sonra daha güclü şəkildə geri qayıtması ilə müşahidə edilən keçici sindromdur. Bu hal digər simptomlarla – əhval dəyişikliyi, təşviş, yuxu pozğunluğu və narahatlıqla müşayiət oluna bilər. Qəfil dayandırma zamanı kəsilmə sindromu və simptomların geri qayıtma riskləri daha yüksək olduğundan, dozanın tədricən azaldılması tövsiyə olunur. Hipnotik təsirlərə görə uzunmüddətli benzodiazepin qəbulundan sonra effektivliyin itməsi baş verə bilər. Uzun təsir müddətli benzodiazepin istifadə edildikdə, qısa təsir müddətli benzodiazepinə keçidin kəsilmə simptomlarına səbəb ola biləcəyi barədə xəbərdarlıq etmək vacibdir.
Amneziya: Benzodiazepinlər anteroqrad amneziyaya (yeni məlumatların yadda saxlanıla bilməməsi) səbəb ola bilər. Bu hal adətən preparat qəbul edildikdən bir neçə saat sonra baş verir.
Psixi və paradoksal reaksiyalar: Benzodiazepinlərin istifadəsi zamanı narahatlıq, təşviş, əsəbilik, aqressivlik, qəzəb tutmaları, kabuslar, hallüsinasiyalar, psixozlar, uyğunsuz davranışlar və digər davranış pozğunluqları müşahidə oluna bilər. Əgər bu hallar baş verərsə, dərmanın istifadəsi dərhal dayandırılmalıdır. Bu reaksiyalar daha çox uşaqlarda və yaşlılarda rast gəlinir.
Preparatın tərkibində 10%-dən çox (96%-li) etanol (spirt) var. Bundan əlavə, preparatın tərkibində natrium benzoat (E211), propilen qlikol və benzil spirti var. Natrium benzoat dərini qıcıqlandırır və selikli qişaları az da olsa qıcıqlandıra bilər. Propilen qlikol dəridə qıcıqlanma yarada bilər. Bu dərman vasitəsinin tərkibində 9.72% həcmində etanol (spirt) var (məsələn, hər doza təxminən 1000 mq spirt ehtiva edir, bu da 20 ml pivəyə və ya 8 ml şəraba bərabərdir). Spirtli içki asılılığı olan şəxslər üçün zərərli ola bilər. Benzil spirti vaxtından əvvəl doğulmuş körpələrə və yenidoğulmuşlara verilməməlidir.
Bu maddə 3 yaşa qədər olan körpə və uşaqlarda toksik və allergik reaksiyalara səbəb ola bilər.

Digər dərman vasitələri ilə qarşılıqlı təsiri
Preparatın sinir sisteminə sakitləşdirici təsiri olan digər dərmanlarla (məsələn, antipsixotiklər, anksiolitiklər, sedativlər, antidepressantlar, hipnotiklər, narkotik analgetiklər, anestetiklər, antiepileptiklər, sakitləşdirici antihistaminlər) və ya qaraciyər fermentləri vasitəsilə metabolizmə təsir edən maddələrlə (məsələn, izoniazid, disulfiram, simetidin, omeprazol, oral kontraseptivlər) birgə istifadəsi sedasiya (sakitləşmə) təsirini gücləndirə və tənəffüs, ürək-damar sisteminin fəaliyyətini zəiflədə bilər. Narkotik analgetiklərlə eyni zamanda istifadəsi eyforiya hissinin artmasına və bununla da psixoloji asılılığın yaranmasına səbəb ola bilər. Simetidin və omeprazol benzodiazepinlərin bədəndən xaric olunmasını (klirensini) azaldır, rifampisin kimi qaraciyər fermentlərini artıran dərmanlar isə bu maddələrin klirensini artıraraq onların təsirini də gücləndirə bilər. Preparat spirtlə birlikdə istifadə edildikdə sedativ (sakitləşdirici) təsiri güclənə bilər. Bu, avtomobil sürmə və mexanizmlərlə işləmə qabiliyyətinə mənfi təsir göstərə bilər. Spirtlə birlikdə istifadəsi tövsiyə olunmur. Teofillin və siqaret çəkmək diazepamın metabolizmini sürətləndirir. Diazepam qaraciyərdə metabolizə olunan dərmanlarla qarşılıqlı təsirə girə bilər. Bəzi dərmanların təsirini azalda (levodopa), digərlərinin təsirini isə artıra bilər (fenitoin, əzələ boşaldıcılar). AÇF inhibitorları, α-blokatorlar, angiotenzin–II reseptor antaqonistləri, kalsium kanalı blokatorları, β-blokatorlar, moksonidin, nitratlar, hidralazin, minoksidil, natrium nitroprussid və diuretiklərlə birgə istifadə zamanı hipotenziv (qan təzyiqsalıcı) təsir artır. α-Blokatorlar və ya moksonidinlə birgə istifadəsi zamanı sedativ təsir daha da güclənir.
Uşaqlarda qarşılıqlı təsir və təhlükəsizliklə bağlı məlumatlar sübut olunmamışdır.

Hamiləlik və laktasiya dövründə istifadəsi
İnsanlarda hamiləlik zamanı dərmanın təhlükəsizliyinə dair heç bir sübut yoxdur. Faydası riski aydın şəkildə üstələmədikcə, xüsusilə birinci və sonuncu trimestrdə hamiləlik zamanı istifadə edilməməlidir.
Laktasiya
Diazepam ana südünə keçir, buna görə də laktasiya dövründə onun istifadəsindən çəkinmək lazımdır.
Fertillik
İnsanlarda terapevtik dozalarda benzodiazepinlərin qəbulu nəticəsində anadangəlmə qüsurların yaranma riski az görünür, lakin bəzi epidemioloji tədqiqatlar damaq yarığı riskinin artdığını göstərmişdir.
Həddindən artıq dozada və benzodiazepinlərlə zəhərlənmə hallarında, ana bətnində bu dərmanlara məruz qalmış uşaqlarda anadangəlmə qüsurlar, əqli gerilik və yenidoğulmuşlarda göz titrəməsi kimi hallar barədə məlumatlar mövcuddur.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Sedasiya (sakitləşmə), amneziya (yaddaş itkisi), diqqət zəifliyi və əzələ funksiyalarının pozulması avtomobil sürmək və mexanizmlərlə işləmək qabiliyyətinə mənfi təsir göstərə bilər. Əgər kifayət qədər yuxu alınmazsa, ayıqlığın pozulması riski daha da arta bilər. Pasiyentlər son dozanın qəbulundan sonra ən azı 24 saat ərzində nəqliyyat vasitəsi idarə etməməli və ya mexanizmlərlə işləməməlidirlər.

İstifadə qaydası və dozaları
Adətən istifadə olunan doza 0.25–0.5 mq/kq-dır. Doza pasiyentin yaşı, çəkisi və fərdi reaksiyasına əsasən təyin olunur.
Uşaqlar
10 kq-dan az və ya 1 yaşdan kiçik uşaqlarda istifadəsi tövsiyə edilmir.
10–15 kq və ya 1–3 yaşlı uşaqlar üçün bir 5 mq-lıq rektal flakon.
Flakon   başlığında olan işarəyə qədər (yarıya qədər) daxil edilir. 15 kq-dan artıq və ya 3 yaşdan yuxarı uşaqlar üçün bir 10 mq-lıq rektal flakon istifadə olunmalıdır.
Böyüklər
Əgər 10 dəqiqə ərzində təsir müşahidə olunmazsa, həm uşaqlarda, həm də böyüklərdə əlavə 10 mq-lıq doza ilə təkrar istifadə edilə bilər. Doza hər 12 saatda bir təkrar edilə bilər. İlkin istifadə zamanı yüksək doza və ya təkrar istifadə olduqda tənəffüs vəziyyəti mütləq nəzarətdə saxlanmalıdır. Əgər qıcolmalar nəzarət altına alınmırsa, digər antikonvulsiv tədbirlər görülməlidir.
Müalicə müddəti mümkün qədər qısa olmalıdır. Simptomları idarə edə biləcək ən aşağı doza istifadə edilməlidir. Pasiyent mütəmadi olaraq yenidən qiymətləndirilməli və müalicəyə davam etməyə ehtiyac olub-olmadığı dəyərləndirilməlidir, xüsusilə simptomlar yoxdursa.
Yalnız rektal istifadə üçündür və flakon yalnız birdəfəlik istifadə üçündür. Böyüklərdə yan pozisiyada, uşaqlarda isə üzü üstə və ya yan pozisiyada yeridilməlidir.

1.Folqa qablaşdırmanı açın. Qapağı açıb çıxarın.

2.Flakonun  ucluğunu tamamilə düz bağırsağa daxil edin (15 kq-dan az uşaqlarda yalnız yarısına qədər  daxil  edin). Flakonun  ucu aşağıya baxacaq şəkildə tutun.
Məhlulu tam boşaltmaq üçün baş barmaq və şəhadət barmağınızla möhkəm sıxaraq flakonun  içindəkiləri tam şəkildə istifadə edin.

3.Geri sorulma baş verməməsi üçün  düz bağırsaqdan çıxarana qədər flakonu sıxılmış vəziyyətdə   saxlayın. Daha sonra pasiyentin oturaq əzələlərini (bud nahiyəsini) qısa müddətə sıxın.
Doza verildikdən sonra flakonda  az miqdarda məhlulun qalması nəzərdə tutulur və bu normaldır.

Əlavə təsirləri
Klinik tədqiqatlarda müşahidə olunan və istifadə edildikdən  sonra  bildirilən əlavə təsirlər aşağıda ətraflı şəkildə verilmişdir. Bu əks təsirlərin görülmə tezliyi belə təsnif edilir: Çox tez-tez (≥ 1/10); Tez-tez (≥1/100 – < 1/10); Nadir hallarda (≥ 1/1000 – < 1/100); Çox nadir hallarda (≥ 1/10,000 – < 1/1000) Yaxud çox nadir (< 1/10,000) və ya naməlum tezlikdə. 
Xüsusilə yaşlı və ümumi vəziyyəti zəif olan pasiyentlər bu əlavə təsirlərə qarşı daha həssas ola bilərlər və onlarda daha aşağı dozaların istifadəsi tələb oluna bilər.
Qan və limfa sistemi pozğunluqları
Nadir: qan pozğunluqları, o cümlədən trombositopeniya
Psixi pozğunluqlar
Tez-tez: ayıqlığın azalması, emosiyaların kütləşməsi, çaşqınlıq, anteroqrad amneziya, paradoksal reaksiyalar
Həssas pasiyentlərdə əvvəlcədən aşkarlanmamış depressiya üzə çıxa bilər.
Sinir sistemi pozğunluqları
Tez-tez: sedasiya, yuxululuq, baş ağrısı, başgicəllənmə (xüsusilə yaşlılarda yıxılma riski ilə), ataksiya, nitq pozuntusu, tremor, yorğunluq, “asılılıq effekti”.
Nadir: ağız quruluğu.
Göz pozğunluqları.
Tez-tez: cüt görmə.
Nadir: digər görmə pozğunluqları.
Kardiovaskulyar pozğunluqlar
Nadir: bradikardiya, sinə ağrısı, hipotoniya.
Tənəffüs, döş qəfəsi və mediastinal pozğunluqlar
Nadir: qırtlaq spazmı, tənəffüsün zəifləməsi.
Həzm sistemi pozğunluqları
Nadir: ürəkbulanma, qusma, epiqastral ağrı, qəbizlik, ishal.
Qaraciyər və öd yolları pozğunluqları
Nadir: xolestatik sarılıq, hepatoselulyar sarılıq.
Naməlum: qaraciyər fermentlərinin yüksəlməsi, sarılıq.
Dəri və dərialtı toxuma pozğunluqları
Çox nadir: allergik dəri reaksiyaları, o cümlədən  angioödem.
Əzələ-skelet və birləşdirici toxuma pozğunluqları
Tez-tez: miasteniya.
Sidik və böyrək sistemi pozğunluqları
Nadir: sidiyin saxlanılması.
Naməlum: sidik qaçırma.
Reproduktiv sistem və süd vəziləri pozğunluqları
Nadir: libido dəyişiklikləri, menstrual pozğunluqlar.
Naməlum: ginekomastiya (kişilərdə süd vəzi böyüməsi).
Ümumi pozğunluqlar və istifadə yerində reaksiyalar
Tez-tez: iştahanın artması.

Doza həddinin aşılması
Simptomları
Doza həddinin aşılması adətən mərkəzi sinir sisteminin müxtəlif dərəcəli depressiyası ilə müşahidə olunur —yüngül hallarda yuxululuqdan, ağır hallarda isə komaya qədər dəyişə bilər.
Yüngül hallarda simptomlara yuxululuq, zehni qarışıqlıq və asteniya (ümumi zəiflik) daxildir. Daha ciddi hallarda isə simptomlara ataksiya (hərəkət koordinasiyasının pozulması), hipotonus (əzələ tonusunun azalması), hipotenziya (aşağı qan təzyiqi), tənəffüs depressiyası, nadir hallarda koma və çox nadir hallarda ölüm daxildir.
Müalicəsi
Doza həddinin aşılması hallarında bir neçə dərman vasitəsinin birlikdə qəbul olunma ehtimalı da nəzərə alınmalıdır. Əgər dozadan artıq qəbul oral yolla baş veribsə, pasiyent ayıqdırsa (1 saat ərzində), qusdurulmalıdır. Əgər pasiyent şüursuzdursa, hava yolunun qorunduğundan əmin olaraq mədə yuyulması aparılmalıdır. Əgər mədənin boşaldılması faydalı deyilsə, dərmanın sorulmasını azaltmaq üçün aktivləşdirilmiş kömür verilməlidir.
Müalicə simptomatikdir. Tənəffüs, nəbz, qan təzyiqi və bədən temperaturu monitorinq olunmalı və ürək-damar və tənəffüs funksiyalarını dəstəkləyən tədbirlər görülməlidir. Flumazenil, benzodiazepinlərin mərkəzi sinir sisteminə təsir edən depressiv təsirini aradan qaldırmaq üçün istifadə olunur.

Buraxılış forması
2,5 ml aşağı sıxlıqlı polietilen flakonda. 5 flakon içlik vərəqə ilə birlikdə  karton qutuya qablaşdırılır.

Saxlanma şəraiti
25°C-dən aşağı temperaturda, işıq və nəmdən qorunan  və  uşaqların əli çatmayan yerdə saxlayın.

Yararlılıq müddəti
2 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
VEM İlaç San. ve Tic. A.Ş., Türkiye.
Çerkezköy Organize Sanayi Bölgesi Karaağaç Mahallesi Fatih Bulvari
No. 38 Kapakli, Tekirdag, Türkiye.

Qeydiyyat vəsiqəsinin sahibi
VEM İlaç San. ve Tic. A.Ş., Türkiye.
Maslak Mahallesi AOS 55. Sokak 42 Maslak A blok Sit.
№ 2/134, Sarıyer, İstanbul, Türkiye.