PANTOTIN

PANTOTİN    100 mq/ml  şərbət
PANTOTIN

Beynəlxalq patentləşdirilməmiş adı: Hopantenic acid

Tərkibi
Təsiredici maddə:   1 ml şərbətin tərkibində 100 mq hopanten turşusu (hopantenat kalsium) vardır.
Köməkçi maddələr: fruktoza, kalium sorbat (E 202), riboflavin, təmizlənmiş su.

Təsviri
Qatı, şəffaf maye, açıq sarıdan sarı rəngə qədər, xarakterik qoxu və şirin dadlı şərbətdir. Saxlama zamanı az miqdarda çöküntü olması mümkündür.

Farmakoterapevtik qrupu
Psixoanaleptik vasitə; psixostimulyator, diqqət və hiperaktivlik defisiti sindromunun müalicəsi üçün vasitə və nootrop vasitə; digər psixostimulyatorlar və nootroplar.

ATC kod: N06BX.

Farmakoloji xüsusiyyətləri
Farmakodinamikası
Hopanten turşusu nootrop (neyrotrofik, neyrometabolik, neyroprotektor), qıcolmaəleyhinə və sedativ xüsusiyyətlərə malikdir. Beyinin hipoksiyaya və toksiki maddələrin təsirinə qarşı davamlılığı yüksəldir, neyronlarda anabolik prosesləri stimulə edir, orta dərəcəli sedativ təsiri yumşaq stimuləedici effektlə birləşdirir, hərəki oynaqlığı zəiflədir, əqli və fiziki iş qabiliyyətini artırır. Patoloji artmış sidik kisə refleksini və detruzorun tonusunu tormozlayır.

Farmakokinetikası
Peroral qəbul edildikdən sonra dərman mədə-bağırsaq traktından sürətlə sorulur. T_max təxminən 1 saatdır. Hopanten turşusu HEB-i keçir. Dərmanın ən yüksək konsentrasiyası böyrəklərdə, qaraciyərdə, dəridə və mədənin divarlarında müşahidə olunur. Dərman metabolizmə uğramır və 48 saat ərzində dəyişməz şəkildə xaric olunur. Qəbul edilən dozanın 67,5%-i böyrəklər tərəfindən, 28,5%-i mədə-bağırsaq traktından xaric olunur.

İstifadəsinə göstərişlər

• Konsentrasiyanın təkmilləşdirilməsi, əqli və fiziki iş qabiliyyətinin, beyin funksiyaları və yaddaş yaxşılaşdırılması;
• yenidoğulmuşlarda beyin pozulmalarının qarşısını almaq;
• uşaq serebral iflicin müalicəsinə əlavə, epilepsiyanın və şizofreniyanın kompleks terapiyasında;
• serebral aterosklerozun simptomlarının təkmilləşdirilməsi, serebrovaskulyar xəstəliklər;

– eləcə də:

• ekstrapiramid və hərəki pozğunluqlar (Myoclonus, Huntington xəstəliyi, hepatolentikular degenerasiya, Parkinson xəstəliyi);
• kəllədaxili travma və neyroinfeksiyalar (baş beynin orqanik zədələnmələri);
• nevrotik pozğunluqlar (kəkələmə, tik, və s.);
• davranış pozğunluqları (hiperaktivlik və diqqət əskikliyi);
• neyrogen sidik kisəsi zəifliyi (poliuriya, pollakiuriya, imperativ çağırış, imperativ sidik saxlamama).

Əks göstərişlər
Dərmana qarşı yüksək həssaslıq, kəskin böyrək çatışmazlığı, hamiləlik (1-ci trimestr), laktasiya dövrü, 6 ayından aşağı uşaqlar.

Xüsusi göstərişlər və ehtiyat tədbirləri
Nootrop preparatlarla, digər MSS stimulyasiya edən vasitələrin birgə istifadəsi məqsədəuyğun deyil. Dərmanın tərkibində fruktoza vardır. Nadir irsi xəstəliklər zamanı fruktozaya həssaslıq yüksək olduqda, dərmanın qəbulu məqsədəuyğun deyil.

Şəkərli diabetdən əziyyət çəkən xəstələr nəzərə almalıdırlar ki, 1 ml siropun tərkibində 0,56 q fruktoza vardır.

Digər dərman vasitələri ilə qarşılıqlı təsiri
Dərman barbituratların təsir müddətini uzadır, qıcolma əleyhinə dərman maddələrinin və yerli anestetiklərin (məs., prokain) təsirini gücləndirir, fenobarbitalın, karbamazepinin, antipsixotik preparatların (neyroleptiklərin) əlavə təsirlərinin qarşısını alır.

Psixostimulyatorlarla birgə istifadəsi zamanı qarşılıqlı stimulyasiyaedici effekt güclənir. Qlisin və etidron turşusu ilə birgə istifadəsi dərmanın effektini yüksəldir.

Hamiləlik və laktasiya dövründə istifadəsi
Hamiləliyin I trimestrində və laktasiya dövründə əks göstərişdir. Hamiləliyin II və III dövründə tövsiyə olunmur.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Müalicənin əvvəlində velosiped, motosiklet və ya yük maşını, eləcə də digər potensial təhlükəli mexanizmləri idarə etdikdə, yan təsirlərinə əsasən (yuxululuq, başda küy) ehtiyatla qəbul olunur.

İstifadə qaydası və dozası
Daxilə, qidadan 15-30 dəq sonra qəbul edilir.

Lazımi miqdarda siropu oral şpris vasitəsi və ya ölçü qapağı ilə ölçülür. Şərbətin həcmini düzgün ölçmək üçün, oral şprisin porşeni silindrin axırına kimi çəkilməli və sonra şpris şərbətin içinə salınıb, porşeni yuxarı lazım olan miqdara kimi qaldırılmalıdır.

Oral şpris və ölçü qapağı istifadədən öncə və sonra isti qaynadılmış  su ilə yuyulmalıdır.

Uşaqlar və yeniyetmələrə (6 aydan 8 yaşa kimi):

• əqli geriləmədə: 5 ml sutkada 4-6 dəfə 3 ay müddətə;
• nitqin inkişafının geriləməsində: 5 ml sutkada 3-4 dəfə 2-3 ay müddətə;
• neyroleptik sindromda (neyroleptik vasitələrin yan təsirini korreksiyası məqsədi ilə): 2,5-5 ml sutkada 3-4 dəfə 1-3 ay müddətə;
• epilepsiyada: 2,5 ml sutkada 3-4 dəfə uzun müddət (6 ay ərzində);
• tiklərdə: 2,5-5 ml sutkada 3-6 dəfə 1-4 ay müddətə;
• sidikburaxmanın pozulması zamanı: 2,5-5 ml sutkada 1-2 dəfə 1-3 ay müddətə, hopanten turşusunun gündəlik doza dərəcəsi 25-50 mq/kq;
• neyroinfeksiyaların və kəllə-beyin travmalarının fəsadları zamanı: 2,5 ml sutkada 3-4 dəfə;
• sinir sisteminin digər xəstəliklərində:
• 6 aydan 1 yaşa kimi: sutkada 5-10 ml;
• 1 yaşdan 3 yaşa kimi: sutkada 5-12,5 ml;
• 3 yaşdan 7 yaşa kimi: sutkada 7,5-15 ml;
• 7 yaşdan yuxarı: sutkada 10-20 ml.

Böyüklər

• neyroleptik sindromda (neyroleptik vasitələrin yan təsirini korreksiyası məqsədi ilə): 5-10 ml sutkada 3 dəfə 1-3 ay müddətə;
• epilepsiyada: 5-10 ml sutkada 3 dəfə uzun müddət (6 aya kimi);
• tiklərdə: 5-10 ml sutkada 3 dəfə 1-5 ay müddətə;
• sidikburaxmanın pozulması zamanı: 5-10 ml sutkada 2-3 dəfə 1-3 ay müddətində;
• neyroinfeksiyaların və kəllə-beyin travmalarının fəsadları zamanı: 2,5 ml sutkada 3-4 dəfə;
• şizofreniyada (psixotrop preparatlarla kompleks şəkildə): 2,5 ml sutkada 2-3 dəfə 1-3 ay müddətə.

Müalicə müddəti 1-4 ay, bəzən 6 ay təşkil edir. 3-6 ay sonra müalicəni təkrarlamaq mümkündür.

Əlavə təsirləri
Dərmanın tərkib hissəsinə qarşı hiperhəssaslıq olduqda allergiya halları qeyd oluna bilər (rinit, konyunktivit, dəri səpgiləri).

Təsadüf hallarda, qısamüddətli simptomlar qeyd edilə bilər: yuxu pozulması və ya yuxululuq, başda küy, başgicəllənmə, baş ağrısı, hiperoyanıqlıq, əzginlik, tormozlanma.

Yuxarıda qeyd edilən hallar yarandıqda, dərmanın qəbulunu dayandıraraq, həkimə və ya əczaçıya müraciət etmək lazımdır.

Doza həddinin aşılması
Dozanı aşmaq məsləhət görülmür. Yuxusuzluğun qarşısını almaq məqsədi ilə dərmanın qəbulu saat 17-dən gec olmamalıdır.

Buraxılış forması
100 ml şərbət polimer flakonda. 1 flakon oral şpris və ya ölçü qapağı və içlik vərəqə ilə birlikdə karton qutuya qablaşdırılır.

Saxlanma qaydası
25°C-dən yüksək olmayan temperaturda, orijinal qablaşdırmada, qaranlıq və uşaqların əli çatmayan yerdə saxlamaq lazımdır. Dondurmaq olmaz.

Yararlılıq müddəti
3 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
JVC “Vitapharm-Com” Ltd., Moldova.
9/5 Lenin street, Comrat, 9/5 MD-3812, ATU Gagauzia , Moldova.

Qeydiyyat vəsiqəsinin sahibi
LN COMPANY LLC, Azerbaijan.
Khirdalan city (AZ 0100), 12th km of Baku-Quba highway, Building 2, Nr3, Azerbaijan.