LINEZAN

Preparatı istifadə etməzdən əvvəl içlik vərəqəsini diqqətlə oxuyun, burada sizin üçün əhəmiy- yətli məlumatlar vardır.
İçlik vərəqəsini saxlayın. Onu yenidən oxumağınız lazım gələ bilər. Əlavə suallarınız olarsa, həkimdən, əczaçıdan və ya tibb bacısından soruşun.
Bu preparat yalnız sizin üçün təyin edilmişdir. Onu başqalarına verməyin.
Preparatın qəbul edildiyi müddəti ərzində həkimə və ya xəstəxanaya getməli olsanız,  bu dərmandan istifadə etdiyiniz barədə həkimə məlumat verin.
Təlimatlara bu içlik vərəqədə göstərildiyi kimi dəqiq əməl edin.
Preparatı tövsiyə edilən dozadan daha yüksək və ya daha aşağı dozalarda istifadə etməyin.

LİNEZAN^®  600 mq/300 ml infuziya üçün məhlul
LINEZAN^®

Beynəlxalq patentləşdirilməmiş adı: Linezolid

Tərkibi
Təsiredici maddə:   1 ml məhlulun tərkibində 2 mq linezolid vardır.
Köməkçi maddələr: natrium sitrat dihidrat, susuz limon turşusu, qlükoza monohidrat, xlorid turşusu və ya natrium hidroksid, inyeksiya üçün su.

Təsviri
Şəffaf, rəngsiz, homogen məhluldur. Müəyyən  vaxtdan  sonra  məhlulun  rənginin  sarımtıla  dəyişməsi  yol  veriləndir.

Farmakoterapevtik qrupu
Digər antibakterial preparatlar.

ATC kodu: J01XX08.

Farmakoloji xüsusiyyətləri
Farmakodinamikası
Təsir mexanizmi
Linezolid – antimikrob preparatların yeni sinfinə – oksazolidinonlar sinfinə aid olan sintetik antibakterial maddə olub, aerob qrammüsbət bakteriyalara qarşı klinik aktivlik göstərir. Linezolid in vitro həmçinin, bəzi anaerob bakteriyalara qarşı aktivdir.  Linezolid bakterial zülalların sintezini bənzərsiz təsir mexanizmi ilə seçici olaraq inhibə edir; ona görə də linezolidin digər qrup antibiotiklərlə çarpaz rezistentliyi gözlənilmir. Xüsusilə, o, bakterial ribosom yerinə (50Ssubvahidin 23S-ə) birləşir və translyasiya prosesinin mühüm komponenti olan 70S funksional kompleksinin əmələ gəlməsinin başlanmasının qarşısını alır.
Həssaslıq: zaman/məhvetmə  əyrisinin tədqiqinin nəticələri göstərir ki, linezolid enterokokklara və stafilokokklara bakteriostatik təsir göstərir. Müəyyən edilmişdir ki, linezolid streptokokkların əksər ştammlarına bakterisid təsir göstərir.
Linezolid aşağıdakı mikroorqanizmlərə qarşı həm in vitro, həm də klinik aktivlik göstərir:

Həssas aerob qrammüsbət bakteriyalar:

• Enterococcus faecium*
• Enterococcus faecalis 
• Staphylococcus aureus*
• Koaqulyasiya mənfi Staphylococci
• Streptococcus agalactiae*
• Streptococcus pneumoniae*
• Streptococcus pyogenes*
• Qrup C Streptococci
• Qrup G Streptococci

Həssas anaerob qrammüsbət bakteriyalar:

• Clostridium perfringens
• Peptostreptococcus anaerobius
• Peptostreptococcus strains

Rezistent bakteriyalar:

• Haemophilus influenzae
• Moraxella catarrhalis 
• Neisseria ştammları
• Enterobactericeae 
• Pseudomonas ştammları

*Klinik effektivlik klinik göstərişlər üzrə sınaqlarda həssas izolyatlar üçün nümayiş etdirilmişdir.

Farmakokinetikası
Absorbsiyası
Linezolid daxilə qəbul edildikdən sonra sürətlə və geniş absorbsiya olunur. Maksimal plazma konsentrasiyası 1-2 saat müddətində yaranır və linezolidin biomənimsənilməsi təqribən 100%-dir.Ona görə də linezolid dozaya heç bir düzəliş edilmədən həm oral, həm də venadaxili istifadə edilə bilər.

Paylanması
İnsanlar və heyvanlar üzərində aparılan tədqiqatlar göstərir ki, linezolid yüksək perfuziyalı toxumalarda asanlıqla paylanır. Linezolid plazma zülalları ilə 31% birləşir və bu, dozadan asılı deyildir.
Paylanma həcmi sağlam böyüklərdə tarazlıq vəziyyətində orta hesabla 40-50 litrə yaxın təşkil edir.

Biotransformasiyası
Linezolid başlıca olaraq morfolin halqasının oksidləşməsi ilə metabolizə olunur. Bu, əsasən iki qeyri-aktiv açıq zəncirli karbon turşusunun törəmələrinin əmələ gəlməsinə səbəb olur; aminoetoksiasetat turşusu metaboliti (A) və hidroksietil qlisin metaboliti (B).

Eliminasiyası
Qeyri-böyrək klirensi linezolidin ümumi klirensinin təqribən 65%-ni təşkil edir. Tarazlıq vəziyyətində hər bir doza təqribən 30% linezolid şəklində , 40% B metaboliti və 10%-i A metaboliti şəklində sidiklə xaric olur. Linezolidin böyrək klirensi aşağıdır (təqribən 40 ml/dəq) və borucuq reabsorbsiyası ilə bağlıdır.

Xəttilik/ qeyri-xəttilik
Linezolidin dozası yüksəldikcə, klirensdə aşağı səviyyədə xətti olmayan vəziyyət gözlənilir. Bu vəziyyətin, linezolidin yüksək dozalarında böyrək və böyrəkdənkənar klirensin daha aşağı olması ilə bağlı olduğu ehtimal edilir. Bununla bərabər klirensdəki fərq azdır və yarımxaricolma dövründə özünü göstərmir.

Linezolidin birdəfəlik və ya çoxlu oral və venadaxili dozlarından sonra orta farmakokinetik parametrləri aşağıdakı cədvəldə  verilmişdir.

Xüsusi xəstə qruplarında farmakokinetikası

Yaşlı xəstələr
Yaşlı xəstələrdə (65 yaş və yuxarı) Linezolidin farmakokinetikasında əhəmiyyətli fərq müşahidə edilmir. Ona görə də  yaşlı xəstələrdə dozaya düzəliş edilməsinə ehtiyac yoxdur.

Uşaqlar
Uşaq yaşlı pasiyentlərdə LİNEZAN -in dozası onların yaşına və bədən kütləsinə görə təyin edilir (bax: “İstifadə qaydası və dozası).

Qadınlar
Qadınlarda dozaya düzəliş edilməsinə ehtiyac yoxdur.

Böyrək çatışmazlığı
Dozaya heç bir düzəliş tələb olunmur (bax: “Farmakokinetikası”,  “Xüsusi xəbərdarlıqlar və ehtiyat tədbirləri”).

Ağır böyrək çatışmazlığı (kreatinin klirensi < 30 ml/dəq): Dozaya heç bir düzəliş tələb olunmur . İki birincili metabolitin daha yüksək təsirinin (10 dəfəyə qədər)  klinik əhəmiyyəti məlum olmadığından, ağır böyrək çatışmazlığı olan pasiyentlərdə linezolid çox böyük ehtiyatla və yalnız o zaman istifadə edilməlidir ki, gözlənilən fayda nəzəri riskdən üstün hesab edilsin.

LİNEZAN -in dozasının təqribən 30%-i hemodializin ilk 3 saatı ərzində orqanizmdən xaric olduğundan, LİNEZAN  dializ alan pasiyentlərdə dializdən sonra istifadə edilməlidir.   Birincili metabolitlərin hemodializ yolu ilə müəyyən dərəcədə xaric olmasına baxmayaraq, bu metabolitlərin plazmada konsentrasiyaları normal böyrək funksiyasına və ya yüngül və ya orta dərəcəli böyrək çatışmazlığına malik pasiyentlərlə müqayisədə çox əhəmiyyətli dərəcədə yüksək olur.

Ona görə də, LİNEZAN ağır böyrək çatışmazlığı olan və  hemodializ alan pasiyentlərdə yalnız o zaman istifadə edilə bilər ki, gözlənilən fayda nəzəri riskdən üstün hesab edilsin.

Bu vaxta qədər faziləsiz ambulator peritoneal dializ alan pasiyentlərdə və ya böyrək çatışmazlığının istənilən digər alternativ müalicəsini alan pasiyentlərdə LİNEZAN -in istifadəsinə dair məlumat yoxdur.

Qaraciyər çatışmazlığı
Linezolidin farmakokinetikası, yüngül-orta dərəcəli qaraciyər çatışmazlığı olan (Çayld-Pyu təsnifatına görə A və ya B sinfi) xəstələrdə dəyişmir.Mövcud məlumatlara görə, mülayim-orta qaraciyər çatışmazlığı olan xəstələrdə dozaya düzəliş edilməsi tövsiyə olunmur.

İstifadəsinə göstərişlər

LİNEZAN pnevmoniyanın və ya dəridə və ya dəri altında baş verən bəzi infeksiyaların müalicəsi üçün istifadə olunur.

• Xəstəxanadaxili pnevmoniya: Staphylococcus aureus (metisillinə-rezistent və metisillinə-həssas ştammlar) və ya Streptococcus pneumoniae (çoxsaylı dərmanlara rezistent ştammlar daxil olmaqla) tərəfindən törədilən infeksiyalar.
• Xəstəxanadankənar pnevmoniya: Streptococcus pneumoniae (çoxsaylı dərmanlara rezistent ştammlar daxil olmaqla) və ya Staphylococcus aureus (yalnız metisillinə-həssas ştammlar ) tərəfindən törədilən infeksiyalar.
• Dərinin və yumşaq toxumanın fəsadlaşmış infeksiyaları (ayaqların diabetik zədələnməsi, yanaşı osteomielit olmadan): Staphylococcus aureus (metisillinə-rezistent və metisillinə-həssas ştammlar ) Streptococcus pyogenes və ya Streptococcus agalactiae tərəfindən törədilən infeksiyalar.

Əks göstərişlər

• Təsiredici maddəyə və ya köməkçi maddələrdən hər hansı birinə (bax: “Tərkibi”) qarşı allergiya (yüksək həssaslıq)
• Monoaminoksidazanın inhibitorları qrupundan olan dərman preparatı qəbul edilirsə (məsələn, fenelzin, izokarboksazid, selegilin, moklobemid) və ya iki həftə əvvələ qədər qəbul edilmişdirsə. Bu dərmanlar depressiyanın və ya Parkinson xəstəliyinin müalicəsi üçün istifadə oluna bilər.
• Göstərilən vəziyyətlərdən hər hansı biri mövcuddursa, LİNEZAN məhlululun istifadəsi sizin üçün uyğun olmaya bilər.
• Bu vəziyyətlərin Sizə aid olmasına şübhəniz varsa, həkimlə məsləhətləşin.
• Əgər yüksək qan təzyiqiniz varsa, əgər bununla əlaqədar olaraq dərman qəbul edir və ya etmirsinizsə,
• Əgər Sizə hipertireoidizm diaqnozu qoyulmuşdursa
• Böyrəküstü vəzin şişi (feoxromositoma) və ya hormon sistemində şişlə bağlı ishal, dəridə qızartı, nəfəs alma zamanı xırıltı (karsinoid sindrom) kimi simptomlar müşahidə olunursa,
• Bipolyar depressiya, şizoeffektiv pozğunluq, sayıqlama və ya digər ruhi problemlər varsa
• Aşağıda sadalanan dərmanlardan hər hansı biri istifadə edilirsə
• Tərkibində psevdoefedrin və ya fenilpropanolamin olan soyuqdəymə- və zökəm- əleyhinə istifadə olunan dərmanlar və ya burun tutulmasını aradan qaldıran dərmanlar (dekonqestantlar)
• Salbutamol, terbutalin, fenoterol kimi, astmanın müalicəsi üçün istifadə olunan dərmanlar
• Trisiklik antidepressantlar və ya serotoninin neyronal geriyə tutulmasının selektiv inhibitorları kimi tanınan amitriptilin, sipramil, klomipramin, dosulepin, doksepin, fluoksetin, fluvoksamin, imipramin, lofepramin, paroksetin, sertralin kimi, depressiya əleyhinə dərmanlar;.
• Sumatriptan və zolmitriptan kimi, miqrenin müalicəsində istifadə olunan dərmanlar
• Adrenalin (epinefrin) kimi qəfləti və kəskin allergik reaksiyaların müalicəsində istifadə olunan dərmanlar
• Noradrenalin (norepinefrin), dofamin və dobutamin kimi qan təzyiqini yüksəldən dərmanlar
• Petidin kimi kəskin ağrıları azaldan dərmanlar
• Buspiron kimi həyəcan pozğunluqlarının müalicəsində istifadə olunan dərmanlar

Xüsusi göstərişlər və  ehtiyat tədbirləri

LİNEZAN -i istifadə etməzdən əvvəl aşağıdakı hallar barədə həkiminizi məlumatlandırın:

Qansızma və ya asanlıqla qanaxma müşahidə olunursa

• Anemiya
• İnfeksiyalara meyillilik
• Anamnezdə qıcolmaların olması
• Qaraciyər və ya böyrək problemləri varsa, xüsusilə dializə gedilirsə
• İshal.

Müalicə müddəti ərzində aşağıdakı simptomlardan əziyyət çəkirsinizsə, dərhal həkimə məlumat verin:

• Dumanlı görmə, rəngli görmədə dəyişikliklər, ətraflı görmədə çətinliklər, görmə sahəsində pozğunluq kimi, görmə problemləri.
• İshal, xüsusilə qanlı ishal varsa, müalicə dayandırıla bilər. Bu, bağırsağın antibiotiklərlə müalicədən sonra baş verən iltihabı ola bilər.
• Təkrarlanan ürəkbulanma və qusma, qarında ağrı və  ya hiperventilyasiya.

Hətta bu əlamətlər keçmişdə olsa belə, Sizin üçün keçərlidirsə, lütfən, bu barədə həkimə məlumat verin.

LİNEZAN -in tərkibindəki bəzi maddələr barədə vacib məlumat:
Bu dərman preparatının hər flakonunda 13.6 q qlükoza vardır. Bu, şəkərli diabet xəstələrində nəzərə alınmalıdır.
Bu dərman preparatının hər flakonunda 38.48 mq natrium vardır. Bu, nəzarət edilən natrium pəhrizi saxlayan xəstələrdə nəzərə alınmalıdır.

Digər dərman vasitələri ilə qarşılıqlı təsiri
Bəzən LİNEZAN müəyyən dərmanlarla qarşılıqlı təsirdə olur. VEMEZOLİD qan təzyiqində, bədən temperaturunda, ürək döyüntülərində dəyişikliklər kimi əlavə təsirlərə səbəb ola bilər.
Aşağıda sadalanan dərmanlardan hər hansı biri istifadə edilərsə və ya son iki həftə əvvələ qədər istifadə edilmişdirsə, bu barədə həkiminizi məlumatlandırın.
Hazırda aşağıdakı dərmanları qəbul edirsinizsə və ya yaxın gələcəkdə qəbul edəcəksinizsə, LİNEZAN -i istifadə etməyin.
Depressiya və ya Parkinson xəstəliyinin müalicəsi üçün istifadə edilən, monoaminoksidazanın inhibitorları  qrupuna aid dərmanlar (məsələn, fenelzin, izokarboksazid, selegilin, moklobemid).
Həmçinin, aşağıda sadalanan dərmanları qəbul edirsinizsə, həkimlə məsləhətləşin. Həkim LİNEZAN  ilə müalicəyə qərar verə bilər, lakin müalicədən əvvəl və müalicə müddəti ərzində ümumi sağlamlıq və qan təzyiqi yoxlanmalıdır. Digər hallarda həkim xəstə üçün daha faydalı olan başqa müalicə üsuluna qərar verə bilər.
Tərkibində psevdoefedrin və ya fenilpropanolamin olan soyuqdəymə- və zökəməleyhinə dərmanlar və ya burun tutulmasını aradan qaldırmaq üçün istifadə olunan dərmanlar.
Salbutamol, terbutalin, fenoterol kimi astmanın müalicəsi üçün istifadə olunan dərmanlar.
Trisiklik antidepressantlar və ya serotoninin neyronal geriyə tutulmasının selektiv inhibitorları kimi tanınan amitriptilin, sipramil, klomipramin, dosulepin, doksepin, fluoksetin, fluvoksamin, imipramin, lofepramin, paroksetin, sertralin kimi depressiya əleyhinə dərmanlar.
Sumatriptan və zolmitriptan kimi miqrenin müalicəsində istifadə olunan dərmanlar.
Adrenalin (epinefrin) kimi qəfil və kəskin allergik reaksiyaların müalicəsində istifadə olunan dərmanlar
Noradrenalin (norepinefrin), dofamin və dobutamin kimi qan təzyiqini yüksəldən dərmanlar.
Petidin kimi kəskin ağrıları azaldan dərmanlar.
Buspiron kimi həyəcan pozğunluqlarının müalicəsində istifadə olunan dərmanlar.
Varfarin kimi qanın laxtalanmasının qarşısını alan dərmanlar.
Rifampisin-antibiotik.

Resept əsasında və ya reseptsiz buraxılmasından asılı olmayaraq hər hansı digər dərman vasitəsi istifadə edirsinizsə və ya yaxın zamanlarda istifadə etmisinizsə, bu barədə həkimə və ya əczaçıya məlumat verin.

Hamiləlik və laktasiya dövründə istifadəsi
Dərmanı istifadə etməzdən əvvəl həkimlə və ya əczaçı ilə məsləhətləşin!
Hamilə qadınlarda LİNEZAN -in effekti müəyyən edilməmişdir.  Buna görə də hamiləlik zamanı həkimlə məsləhətləşmədən preparatı istifadə etməyin. Əgər hamiləsinizsə və ya hamilə qalmağı planlaşdırırsınızsa, bu haqda həkimə məlumat verin.

Müalicə müddəti ərzində hamilə olduğunuzu hiss etsəniz, bu barədə dərhal həkimi məlumatlandırın!
Laktasiya
Dərmanı istifadə etməzdən əvvəl həkimlə və ya əczaçı ilə məsləhətləşin!
LİNEZAN -in ana südünə keçməsi məlum deyil.  Laktasiya dövründə müalicəni davam etdirmək/müalicəni dayandırmaq və ya ana südü ilə qidalandırmanı dayandırmaq barədə qərar verərkən, həkiminiz LİNEZAN ilə müalicənin anaya faydası ilə ana südü ilə qidalandırmanın südəmər uşağa faydasını nəzərə alacaqdır. 

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
LİNEZAN  başgicəllənməyə səbəb ola bilər. Belə hallar baş verərsə, LİNEZAN -i istifadə etməyin, çünki o, nəqliyyat vasitələrini və digər potensial təhlükəli mexanizmləri idarəetmə qabiliyyətinə mənfi təsir göstərə bilər.

İstifadə qaydası və dozası
Preparat venadaxili damcı üsulu ilə yeridilir.
Doza xəstəlikdən asılı olaraq həkim tərəfindən təyin ediləcəkdir. Bu dərman həkim və ya tibbi personal tərəfindən damcı üsulu ilə venadaxili infuziya şəklində istifadə ediləcək. Böyüklər üçün (18 yaş və yuxarı) gündə iki dəfə 300 ml (600 mq linezolid) məhlul 30 dəq-dən 120 dəqiqəyə qədər  müddət ərzində birbaşa qana (venadaxili) yeridiləcək.
Müalicə kursu adətən 10-14 gün təşkil edir, lakin 28 günə qədər uzadıla bilər. Müalicə müddəti 28 günü keçdikdən sonra dərmanın təhlükəsizliyi və effektivliyi müəyyən olunmamışdır. Müalicə müddətinə dair qərarı həkiminiz verəcək.
LİNEZAN qəbul edilən zaman həkim qan parametrlərinə nəzarət etmək üçün müntəzəm olaraq qan analizləri aparacaqdır.

Uşaqlarda istifadəsi
LİNEZAN adətən uşaqlar və yeniyetmələrin ( 18 yaşdan kicik) müalicəsində istifadə edilmir

Xüsusi hallar
Böyrək çatışmazlığı
Həkim böyrək çatışmazlığı olan şəxslər üçün dozaya xüsusi düzəliş etmir.
Böyrək çatışmazlığı inkişaf edibsə və ya pasiyent dializə gedirsə, həkim dərmanın istifadə edilib-edilməyəcəyi barədə qərar verəcək. Dializ alan psiyentlərə preparatı dializdən sonra təyin etmək lazımdır.

Qaraciyər çatışmazlığı
Həkim qaraciyər çatışmazlığı olan şəxslər üçün dozaya xüsusi düzəliş etmir.
Qaraciyər çatışmazlığının dərəcəsindən asılı olaraq həkim bu dərmanın istifadə edilib-edilməyəcəyi barədə qərar verəcək.

LİNEZAN -in qida və içkilərlə birlikdə istifadəsi:
LİNEZAN  qida qəbulundan əvvəl, qida qəbulu zamanı və ya qida qəbulundan sonra istifadə edilə bilər.
Artıq miqdarda dəymiş pendir, maya çıxarışları  və ya soya paxlası çıxarışlarından uzaq durmaq lazımdır, məsələn, soya sousu və spirtli içkilər, xüsusilə çəllək pivəsi və şərab. Bu, preparatın bəzi ərzaqlarda təbii olaraq rast gəlinən tiramin adlı maddə ilə reaksiyaya girməsinə və qan təzyiqinin artmasına səbəb ola bilər.

Qida  və ya içki qəbulundan sonra pulsasiyaedici  başağrısı inkişaf edərsə, dərhal həkimə və ya əczaçıya müraciət edin.

Dozanın istifadəsi unudulduqda
Dozanın unudulması az ehtimal olunur, belə ki, LİNEZAN -in infuziyası həkim və ya tibb bacısının ciddi nəzarəti altında həyata keçirilir.  Lakin, əgər Siz bir  müalicəvi dozanın buraxıldığını düşünürsünüzsə,  bu barədə dərhal həkimə və ya tibb bacısına məlumat verin.

LİNEZAN -lə müalicə bitdikdən sonra müşahidə oluna biləcək effektlər
Preparatın istifadəsi barədə həkimlə məsləhətləşin.

Əlavə təsirləri
Bütün dərmanlarda olduğu kimi, LİNEZAN preparatı da onun tərkibində olan komponentlərə qarşı yüksək həssaslığı olan pasiyentlərdə əlavə təsirlərin meydana çıxmasına səbəb ola bilər.
LİNEZAN -la müalicə müddətində hər hansı əlavə təsir meydana çıxarsa, dərhal həkimə, tibb bacısına və ya əczaçıya məlumat verin.
Xüsusilə üz və boyun ətrafında dəridə qırmızı rəngli yaralar və qabıqlanma(dermatit), səpgi, qaşınma və ya şişkinlik kimi dəri reaksiyaları. Bu, allerik reaksiyanın götəricisi ola və LİNEZAN -in istifadəsinin dayandırılmasını zəruri edə bilər.
Dumanlı görmə, rəngli görmədə dəyişikliklər, ətraflı görmədə çətinliklər, görmə sahəsində problemlər.
Əgər Sizdə ishal, xüsusilə qanlı ishal varsa, müalicənin dayandırılması lazım gələ bilər. Bu, bağırsağın antibiotiklərlə müalicədən sonra baş verə bilən iltihabı ola bilər.
Təkrarlanan ürəkbulanma və qusma, qarında ağrı və hiperventiltasiya.
28 gündən artıq linezolid təyin edilən şəxslərdə hissiyyatın itməsi, iynəbatma hissi və ya dumanlı görmə kimi əlamətlərin müşahidə olunduğu haqda məlumat verilir. Görmə ilə bağlı çətinliklər müşahidə edirsinizsə, mümkün qədər tez həkimlə məsləhətləşməlisiniz.

Digər əlavə təsirləri
Əlavə təsirlər aşağıdakı kateqoriyalara uyğun olaraq sadalanır.
Çox tez-tez: 10 xəstənin ən azı 1-də rast gələ bilər.
Tez-tez: 10 xəstənin 1-dən azında, lakin 100 xəstənin 1-dən çoxunda rast gələ bilər.
Bəzən: 100 xəstənin 1-dən azında, lakin 1000 xəstənin 1-dən çoxunda rast gələ bilər.
Nadir: 1000 xəstənin 1-dən azında rast gələ bilər.
Çox nadir: 10000 xəstənin 1-dən azında rast gələ bilər.
Məlum deyil:mövcud məlumatlara əsasən başvermə tezliyini müəyyən etmək mümkün deyil.
Tez-tez:
Göbələk infeksiyaları, xüsusilə vaginal infeksiyalar və ağız boşluğunun süd yarası.
Başağrısı.
Yuxusuzluq.
Başgicəllənmə.
Qan təzyiqinin artması.
Həzmin pozulması, qarın ağrısı, qəbizlik.
Ağızda metal dadı.
Qızdırma, ağrı.
Dərinin qızarması, səpgi.
İshal, ürəkbulanma və qusma.
Böyrək və ya qaraciyər funksiyalarının və ya qanda şəkərin səviyyəsinin ölçülməsi daxil olmaq-la, bəzi qan analizlərinin nəticələrində dəyişiklik.
Qanda müəyyən hüceyrələrin sayının dəyişməsi nəticəsində baş verən, laxtalanmaya təsir göstərə bilən və ya anemiya yarada bilən səbəbi bilinməyən qanama və göyərmə.

Bəzən
Qadınlarda vagina və ya genital bölgədə iltihab.
Qanda infeksiyaya qarşı mübarizə aparan müəyyən hüceyrələrin sayında dəyişiklik.
Qıcolma, bəzən sancma hissi və ya qeyri-həssaslıq.
Hiponatriemiya.
Dumanlı görmə.
Qulaqlarda “cingilti” (tinnitus).
Aritmiya (taxikardiya).
Venalarda iltihab, keçici işemik tutmalar (beyinə qan axınının keçici pozulması; görmənin azalmasına, ayaq və qollarda zəifliyə, nitqin pozulmasına və şüurun dumanlanmasına səbəb olur).
Ağızda quruma və ya yara, dildə şişkinlik, yara, rəngin dəyişməsi.
Vena ətrafında ağrı.
Venalarda iltihab (damcı üsulu ilə infuziya olunan yer daxil olmaqla).
Daha tez-tez sidiyəgetmə.
Üşütmə, inyeksiya nahiyəsində ağrı.
Yorğunluq və susuzluq hissi.
Mədəaltı vəzinin iltihabı, qastrit, meteorizm, sulu nəcis.
Tərləmənin artması, övrə, dermatit.
Böyrək çatışmazlığı, poliuriya.
Qanda böyrək və qaraciyər funksiyalarının göstəricisi olan  proteinlərin, duzların və ya fermentlərin səviyyəsində dəyişikliklər.
İnfeksiyalara qarşı mübarizə aparan qan hüceyrələrinin azalması.
Aşağıda göstərilmiş əlavə təsirlər daha az dərəcədə müşahidə edilmişdir.
Mielosupressiya.
Serotonin sindromu (sürətli ürək döyüntüləri, həyəcan, anormal miqdarda tərləmə, hallüsinasiyalar, qeyri-iradi titrəmə və üşütmə).
Perfiferik neyropatiya.
Laktoasidoz (təkrarlanan ürəkbulanma və qusma, qarında ağrı, hiperventilyasiya kim simptomlar daxildir).
Anafilaksiya.
Ciddi dəri xəstəlikləri, alopesiya.
Psevdomembranoz kolit daxil olmaqla, antibiotiklərlə əlaqədar kolit.
Pansitopeniya.
Optik neyropatiya, optik nevrit, görmənin itməsi, görmə itiliyinin azalması, rəngli görmədə dəyişiklik. 

Doza həddinin aşılması
Artıq dozada LİNEZAN infuziyası yeridildiyini düşünürsünüzsə,dərhal bu barədə həkimə və ya tibb bacısına məlumat verin.

Buraxılış forması
300 ml (600 mq linezolid) məhlul, ağzı bromobutil tıxacla bağlanmış və ağ rəngli flip-off qapaqla bərkidilmiş polipropilen flakonda.  1 (2 , 5, 10, 20)  flakon, müvafiq sayda içlik vərəqə ilə birlikdə karton qutuya qablaşdırılır.

Saxlanma şəraiti
25 C-dən aşağı otaq temperaturunda, orijinal qablaşdırmasında,  quru və uşaqların əli çatmayan  yerdə saxlamaq lazımdır.
Flakon açıldıqdan sonra dərhal istifadə olunmalıdır. Açıldıqdan sonra istifadə olunmamış məhlul atılmalıdır. LİNEZAN infuziya üçün məhlulu zaman keçdikcə sarı rəng ala bilər, lakin bu, dərmanın keyfiyyətinə məhfi təsir göstərmir.

Yararlılıq müddəti
Yararlılıq müddəti qablaşdırmanın üzərində qeyd olunmuşdur.
Yararlılıq müddəti bitdikdən sonra istifadə etmək olmaz.
Məhlulda və ya qablaşdırmada qüsurlar aşkar etsəniz, LİNEZAN -i istifadə etməyin.
Son istifadə tarixi keçmiş və ya açıldıqdan sonra istifadə olunmamış dərmanları məişət tullantılarının içərisinə  atmayın! Butədbirlər ətraf mühitin qorunmasına kömək edə bilər.

Aptekdən buraxılma şərti
Resept əsasında buraxılır.

İstehsalçı/Qeydiyyat vəsiqəsinin sahibi
ANFARM HELLAS S.A.
61st km NAT. RD. Athens-Lamia Schimatari Viotias 32009, Yunanıstan.