SETORIB 90 – Biogen

SETORİB 90 Örtüklü tabletlər
SETORIB 90

Beynəlxalq patentləşdirilməmiş adı: Etoricoxib

Tərkibi
Təsiredici maddə: 1 tabletin tərkibində 90 mq etorikoksib vardır.
Köməkçi maddələr: mikrokristallik sellüloza (102), susuz iki əsaslı kalsium fosfat (Fujikalin), natrium kroskarmelloza, koloidal silikon dioksid, maqnezium stearat, instacoat universal (ağ) IC-U-1308, instacoat IC-A-3752 çəhrayı.

Təsviri
Setorib 90 mq
Açıq çəhrayı rəngdə hər iki tərəfdən qabarıq, bir tərəfində “ACME” basmayazısı olan, digər üzündə qırılma xətti olan düzbucaqlı örtüklü tablet.

Farmakoterapevtik qrupu
Qeyri-steroid iltihab əleyhinə və revmatizm əleyhinə preparat, koksib.

ATC kodu: M01AH05.

Farmakoloji xüsusiyyətləri
Farmakodinamikası

Təsir mexanizmi:
Etorikoksib klinik doza diapazonunda oral, selektiv siklooksigenaza-2 (SOG-2) inhibitorudur.

Klinik farmakoloji tədqiqatlarda etorikoksib gündə 150 mq dozada qəbul edildikdə SOG-1-i inhibə etmədən SOG-2-ni dozadan asılı olaraq inhibə etmişdir. Etorikoksib mədədə prostaqlandinlərin sintezini inhibə etmir və trombositlərin funksiyasına təsir göstərmir.

Sikloksigenaza prostaqlandinlərin sintezinə cavabdehdir. İki izoforma – SOG-1 və SOG-2 müəyyən edilmişdir. SOG-2, iltihabəleyhinə impulslarla induksiya edilən və ağrının, iltihabın, qızdırmanın postanoid mediatorlarının sintezinə cavabdeh olan əsas amil kimi nəzərdən keçirilən fermentin izoformasıdır. SOG-2 həmçinin ovulyasiya, implantasiya və arterial axacağın bağlanması proseslərində, böyrəklərin və mərkəzi sinir sisteminin funksiyalarının tənzimlənməsində (qızdırmanın induksiyası, ağrının hiss olunması, koqnitiv funksiya), o cümlədən xoraların sağalma prosesində iştirak edir. SOG-2 insanda mədə xorasının ətrafındakı toxumalarda müəyyən edilmişdir, lakin onun xoranın sağalması ilə əlaqəsi müəyyən edilməmişdir.

Farmakokinetikası
Absorbsiyası
Peroral qəbul olunan etorikoksib yaxşı sorulur. Mütləq biomənimsənilməsi təxminən 100% təşkil edir. Gündə 1 dəfə 120 mq qəbul edildikdən sonra tarazlıq vəziyyəti əldə edilənə qədər qan plazmasında maksimal qatılığı (orta həndəsi göstərici Cmax=3.6 mkq/ml) böyüklər tərəfindən acqarına qəbul edildikdən təxminən 1 saat sonra (Tmax) müşahidə edilir. Orta həndəsi (AUC0-24h) 37.8 mkq x saat/ml təşkil etmişdir. Klinik dozalar diapazonunda etorikoksibin farmakokinetikası xətti olur.

Etorikoksibi 120 mq dozada yemək vaxtı qəbul etdikdə (tərkibində yağların miqdarı yüksək olan qida) absorbsiyanın dərəcəsinə klinik əhəmiyyətli təsir müşahidə edilməmişdir. Absorbsiyanın sürəti dəyişilmişdir ki, bu da Cmax göstəricisinin 36% azalması və Tmax göstəricisinin 2 saat artması ilə xarakterizə edilmişdir. Bu cür məlumatlara klinik əhəmiyyətli kimi baxılmır. Klinik sınaqlarda etorikoksib qida qəbulundan asılı olmayaraq qəbul edilmişdir.

Paylanması
Etorikoksib 0,05-5 mkq/ml qatılıqda insanın qan plazması zülalları ilə təxminən 92% birləşir. İnsanda tarazlıq vəziyyətində paylanma həcmi təxminən 120 litr təşkil edir. Etorikoksib siçovul və dovşanlarda cift baryerindən, həmçinin, siçovullarda hematoensefalik baryerdən keçir.

Metabolizmi
Etorikoksib aktiv şəkildə metabolizmə uğrayır, dozanın 1%- i əsas dərman kimi sidiklə xaric olunur. Əsas metabolizm yolu CYP fermentləri vasitəsilə katalizasiya yolu ilə 6′-hidroksimetil törəməsinin formalaşmasıdır. CYP3A4 etorikoksibin in vivo olaraq metabolizmə uğramasına şərait yaradır. In vitro tədqiqatlar göstərir ki, CYP2D6, CYP2C9, CYP1A2 və CYP2C19 da metabolizmin əsas yolunu kataliz edə bilirlər, lakin onların in vivo kəmiyyət rolu öyrənilməmişdir.

İnsanda beş metabolit müəyyən edilmişdir. Əsas metabolit etorikoksibin 6′-karboksilik turşusu törəməsidir, 6′-hidroksimetil törəməsinin sonrakı oksidləşməsi nəticəsində əmələ gəlir. Bu əsas metabolitlər ya ölçülə bilən fəaliyyət göstərmir, ya da SOG-2-nin zəif aktiv inhibitorlarıdır. Bu metabolitlərin heç biri SOG-1-i inhibə etmir.

Xaric olması
Radioizotopla nişanlanmış 25 mq etorikoksibin sağlam könüllü şəxslərə birdəfəlik venadaxilinə yeridilməsindən sonra, radioaktivliyin 70%-i sidiklə, 20%-i isə nəcislə, əsasən metabolitlər şəklində xaric edilir. 2%-dən az hissə dəyişilməmiş şəkildə xaric olunur.

Etorikoksib, əsasən sonradan böyrəklər vasitəsilə xaric edilməklə metabolizm vasitəsilə xaric edilir. Etorikoksibin tarazlıq qatılığına yeddi gün ərzində gündə bir dəfə 120 mq dozada qəbul edildikdə nail olunur və yığılma göstəricisi təxminən 2-yə bərabər olur ki, bu da təxminən 22 saat yarımxaricolma dövrünə uyğundur. 25 mq venadaxili dozadan sonra plazma klirensi təqribən 50 ml/dəq təşkil edir.

İstifadəsinə göstərişlər
SETORİB 90 (Etorikoksib) ağrı və iltihabı aradan qaldırmaq üçün təyin edilir:

Osteoartrit;
Revmatoid artrit;
Ankilozan spondilit;
Digər xroniki dayaq-hərəkət sisteminin xəstəlikləri;
Kəskin podaqra;
Dismenoreya;
Stomatoloji əməliyyatdan sonra.

Əks göstərişlər

Təsiredici maddəyə və ya preparatın tərkibinə daxil olan istənilən komponentə qarşı hiperhəssaslıq.
Aktiv peptik xora və ya mədə-bağırsaq qanaxmaları.
Asetilsalisil turşusu və ya QSİƏP, o cümlədən siklooksigenaza-2-nin (SOG-2) inhibitorlarının qəbulundan sonra bronxospazm, kəskin rinit, nazal poliplər, angionevrotik ödem, övrə və ya digər allergik reaksiyalar baş verən xəstələr.
Hamiləlik və laktasiya dövrü.
Qaraciyər funksiyasının ağır pozuntuları (qan zərdabının albumini Çayld-Pyu şkalasına görə < 25 q/l və ya ≥ 10 bal).
Böyrəyin kreatinin klirensinin < 30 ml/dəqiqə olması.
Uşaqlar və 16 yaşa qədər yeniyetmələr.
Bağırsağın iltihabi xəstəlikləri.
Durğunluq ürək çatışmazlığı (NYHA II-IV).
Arterial təzyiqin daima 140/90 mm c.süt-dan yüksək olduğu və lazımi dərəcədə nəzarət olunmadığı arterial hipertenziyalı xəstələr.
Ürəyin diaqnozlaşdırılmış işemik xəstəliyi, periferik arteriyaların xəstəlikləri və / və ya ürək-damar xəstəlikləri.

Xüsusi göstərişlər və ehtiyat tədbirləri
Mədə-bağırsaq traktına təsiri
Etorikoksib qəbul edən xəstələrdə mədə-bağırsaq traktında bəzən fatal sonluqla nəticələnən ağırlaşmalar (perforasiya, xora və ya qanaxma) haqqında məlumatlar verilmişdir.

MBT-də ağırlaşmaların inkişaf riski yüksək olan xəstələrin (yaşlı pasiyentlər, eyni vaxtda istənilən digər QSİƏP və ya asetilsalisil turşusu qəbul edən xəstələrin və ya anamnezdə yara və ya mədə-bağırsaq qanaxması kimi xəstəlikləri olan xəstələrin) müalicəsi zamanı QSİƏP-i ehtiyatla qəbul etmək lazımdır.

Etorikoksib və asetilsalisil turşusunun eyni vaxtda qəbul edilməsi zamanı (hətta aşağı dozalarda) MBT-də əlavə reaksiyaların (mədə-bağırsaq yaraları və ya MBT-də digər ağırlaşmalar) əmələ gəlməsinin əlavə riski mövcud olur. Uzunmüddətli klinik tədqiqatlarda SOG-2-nin seçici inhibitoru + asetilsalisil turşusu və QSİƏP + asetilsalisul turşusunun qəbulu zamanı təhlükəsizlik baxımından MBT üçün güclü fərqlər müşahidə edilməmişdir.

Ürək-damar sisteminə təsiri
Klinik tədqiqatlar göstərir ki, SOG-2-nin seçici inhibitorlarının qəbul edilməsi plasebo və bəzi QSİƏP ilə müqayisədə trombotik ağırlaşmaların (xüsusilə miokard infarktı və insultun) əmələ gəlmə riskinin meydana çıxmasına səbəb olur. Etorikoksibin dozasını və istifadə müddətini artırdıqda ürək-damar ağırlaşmaları riski yüksələ bildiyindən, preparatı maksimum qısa müddət ərzində minimal effektiv dozalarda qəbul etmək lazımdır.

Xüsusilə də osteoartritli xəstələrdə simptomların yüngülləşdirilməsinin vacibliyini və aparılan müalicəyə qarşı xəstələrin cavab reaksiyasını dövrü olaraq yenidən qiymətləndirmək lazımdır.

Ürək-damar ağırlaşmalarının inkişafının güclü risk amilləri (məsələn, arterial hipertenziya, hiperlipidemiya, şəkərli diabet və siqaret çəkmə) qeyd olunan xəstələrin etorikoksiblə müalicəsinə bu cür imkanın olmasını diqqətlə araşdırdıqdan sonra başlamaq lazımdır.

SOG-2-nin seçici inhibitorları ürək-damar tromboembolik xəstəliklərinin profilaktikası üçün aspirinin əvəzedicisi deyil, çünki onlar trombositlərə təsir göstərmir. Buna görə də antiaqreqant preparatların qəbulunu dayandırmaq olmaz.

Böyrəklərə təsiri
Böyrək prostaqlandinləri böyrəklərin perfuziyasının dəstəklənməsində kompensator rol oynaya bilər. Buna görə də böyrək perfuziyasının pozulması zamanı etorikoksibin qəbulu prostaqlandinlərin əmələ gəlməsinin azalmasına və bunun nəticəsində – böyrək qan cərəyanının zəifləməsinə və böyrək funksiyalarının pozulmasına gətirib çıxara bilər. Buna qədər böyrək funksiyalarının güclü pozuntusu, kompensasiya olunmayan ürək çatışmazlığı və ya sirroz olan xəstələrdə bu cür reaksiyaların riski daha yüksək olur. Bu cür xəstələrdə böyrək funksiyalarının yoxlanılmasının mümkünlüyünü müzakirə etmək lazımdır.

Mayelərin ləngiməsi, ödemlər və arterial hipertenziya
Prostaqlandinlərin sintezini inhibə edən digər preparatların qəbulu zamanı olduğu kimi, etorikoksibin qəbulu zamanı bəzi xəstələrdə mayelərin ləngiməsi, ödemlər və arterial hipertenziya müşahidə edilmişdir. Bütün QSİƏP, o cümlədən etorikoksib, durğunluq ürək çatışmazlığının əmələ gəlməsinə və onun residiv verməsinə gətirib çıxara bilər. Preparatı anamnezində ürək çatışmazlığı, sol mədəcik funksiyalarının pozulması və ya arterial hipertenziya olan xəstələrə, həmçinin istənilən digər səbəbdən ödem əmələ gəlmiş xəstələrə ehtiyatla təyin etmək lazımdır. Belə xəstələrin vəziyətinin pisləşməsinin kliniki əlamətləri olduqda müvafiq tədbirlər görülməlidir, etorkoksibin ləğv edilməsi daxil olmaqla.

Etorikoksibdən istifadə bəzi QSİƏP-nin və SOG-2-nin seçici inhibitorlarından istifadəyə nisbətən (o cümlədən yüksək dozalarda) daha tez-tez və ağır arterial hipertenziya ilə müşayiət oluna bilər. Buna görə də etorikoksiblə müalicəyə başlamazdan əvvəl hipertenziya nəzarət altına alınmalı, həmçinin etorikoksiblə müalicə zamanı arterial təzyiqə nəzarətə xüsusi diqqət yetirilməlidir. Arterial təzyiqi (AT) müalicəyə başladıqdan sonra 2 həftə ərzində, sonra isə dövrü olaraq yoxlamaq lazımdır. Əgər AT xeyli dərəcədə yüksələrsə, alternativ müalicənin mümkünlüyünü nəzərdən keçirmək lazımdır.

Qaraciyərə təsiri
Klinik tədqiqatlar zamanı etorikoksibi gündə 30, 60 və 90 mq dozalarda 1 il ərzində qəbul edən xəstələrin təxminən 1%-də alaninaminotransferazanın (ALT) və / və ya (aspartataminotransferazanın) AST-nin aktivliklərinin artması müşahidə edilmişdir (normanın yuxarı sərhəddindən təxminən 3 və daha çox dəfə yüksək).

Qaraciyər funksiyasının pozulmasının simptom və / və ya əlamətləri olan bütün xəstələrin, həmçinin qaraciyər funksiyalarının patoloji göstəricilərinə malik olan xəstələrin vəziyyəti üzərində müşahidə aparmaq lazımdır. Qaraciyər funksiyalarının pozulmasının əlamətləri meydana çıxdıqda və ya qaraciyərin funksional göstəricilərinin davamlı patoloji dəyişiklikləri zamanı (normanın yuxarı hüdudundan 3 dəfə çox) etorikoksibdən istifadəni dayandırmaq lazımdır.

Ümumi göstərişlər
Əgər müalicə dövründə xəstədə yuxarıda göstərilən orqanlar sisteminin funksiyalarının pisləşməsi müşahidə edilərsə, müvafiq tədbirlər görmək və etorikoksibdən istifadənin dayandırılması məsələni nəzərdən keçirmək lazımdır. Etorikoksibi yaşlı xəstələrə və böyrək, qaraciyər və ya ürək funksiyaları pozulmuş xəstələrə təyin edərkən müvafiq tibbi müşahidə aparmaq lazımdır.

Dehidratasiyalı xəstələrin etorikoksiblə müalicəsinə ehtiyatla başlamaq lazımdır. Etorikoksibi qəbul etməzdən əvvəl rehidratasiya həyata keçirmək tövsiyə edilir.

Bəzi hallarda fatal sonuclanan ciddi dəri reaksiyalarının, o cümlədən eksfoliativ dermatit, Stivens-Conson sindromu və toksiki epidermal nekrolizin əmələ gəlməsi haqqında marketinqdənsonrakı müşahidə dövründə QSİƏP və SOG-2-nin bəzi seçici inhibitorlarının qəbul edilməsi zamanı çox nadir hallarda məlumatlar verilmişdir. Bu cür reaksiyaların əmələ gəlməsinin ən yüksək riski terapiyanın əvvəlində, təzahürlər meydana çıxdıqda, əksər hallarda, müalicənin birinci ayı ərzində qeyd olunur. Etorikoksib qəbul edən xəstələrdə ciddi hiperhəssaslıq reaksiyalarının meydana çıxması haqqında məlumatlar verilmişdir (məsələn, anafilaksiya və ya angionevrotik ödem). SOG-2-nin bəzi seçici inhibitorları anamnezində hər hansı preparata qarşı allergik reaksiyası olan xəstələrdə dəri reaksiyalarının əmələ gəlmə riskini artıra bilər. Dəridə səpgilərin, selikli qişaların zədələnməsinin və ya hiperhəssaslığın digər əlamətlərinin ilk təzahürləri meydana çıxdıqda etorikoksibdən istifadəni dayandırmaq lazımdır.

Etorikoksib qızdırmanın və ya infeksiyanın digər əlamətlərini gizlədə bilər.

Etorikoksibi varfarinlə və ya digər peroral antikoaqulyanlarla eyni vaxtda ehtiyatla təyin etmək lazımdır.

Etorikoksib də SOG-ni və prostaqlandinlərin sintezini inhibə edən digər preparatlar kimi hamiləliyi planlaşdıran qadınlara göstəriş deyil.

Digər dərman vasitələri ilə qarşılıqlı təsiri
Farmakodinamik qarşılıqlı təsirlər
Peroral antikoaqulyantlar
Varfarinin daima qəbul edilməsi nəticəsində vəziyyətləri yaxşılaşmış xəstələrin gündə 120 mq dozada etorikoksib qəbul etməsi Beynəlxalq normallaşdırılmış nisbətinin (BNN) protrombin müddətinin təxminən 13% artması ilə müşayiət olunmuşdur. Buna görə də peroral antikoaqulyantlar qəbul edən xəstələrdə, xüsusilə də etorikoksibin qəbulunun ilk günləri və ya onun dozasının dəyişdirilməsi zamanı, BNN-nin protrombin müddətini tez-tez yoxlamaq lazımdır.

Diuretiklər, angiotenzinçevirici ferment (AÇF) və angiotenzin II antaqonistləri
QSİƏP diuretiklərin və digər antihipertenziv preparatların effektini zəiflədə bilir. Böyrək funksiyaları pozulmuş bəzi xəstələrdə (məsələn, dehidratasiyalı xəstələrdə və ya böyrək funksiyaları zəifləmiş yaşlı xəstələrdə) AÇF inhibitorunun və ya angiotenzin II antaqonistinin və SOG-ni inhibə edən preparatların eyni vaxtda qəbul edilməsi böyrək funksiyalarının sonrakı pisləşməsinə, o cümlədən ehtimal olunan böyrək çatışmazlığına gətirib çıxara bilər ki, bu da adətən geridönən xarakter daşıyır. Etorikoksibi AÇF inhibitorları və ya angiotenzin II antaqonistləri ilə eyni vaxtda qəbul edən xəstələrdə bu cür qarşılıqlı təsirin əmələ gəlmə ehtimalını yadda saxlamaq lazımdır. Buna görə də bu cür kombinasiyanı, xüsusilə də yaşlı xəstələrə, ehtiyatla təyin etmək lazımdır. Adekvat hidratasiya həyata keçirmək və kombinasiya olunmuş müalicənin əvvəlində, həmçinin sonralar müəyyən dövrülüklə böyrək funksiyalarının monitorinqinin həyata keçirilməsi haqqında məsələni nəzərdən keçirmək lazımdır.

Asetilsalisil turşusu
Sağlam könüllü şəxslərin iştirakı ilə həyata keçirilən tədqiqatda, tarazlıq vəziyyətində etorikoksibin gündə bir dəfə 120 mq dozada qəbul edilməsi asetilsalisil turşusunun (81 mq gündə 1 dəfə) antiaqreqant aktivliyinə təsir göstərmir. Etorikoksibi ürək-damar sistemində ağırlaşmaların profilaktikası üçün nəzərdə tutulmuş dozalarda asetilsalisil turşusu ilə eyni vaxtda qəbul etmək olar. Lakin asetilsalisil turşusunun kiçik dozalarının və etorikoksibin eyni vaxtda qəbul edilməsi etorikoksiblə monoterapiya ilə müqayisədə MBT-də yaraların əmələ gəlməsinin və digər ağırlaşmaların tezliyinin artmasına gətirib çıxara bilər. Etorikoksibi ürək-damar sistemində ağırlaşmaların profilaktikası üçün nəzərdə tutulmuş dozadan yüksək dozada asetilsalisil turşusu, həmçinin digər QSİƏP ilə eyni vaxtda qəbul etmək tövsiyə edilmir.

Siklosporin və takrolimus
Etorikokoksibin bu preparatlarla qarşılıqlı təsiri öyrənilməsə də, QSİƏP-nin siklosporinlərlə və takrolimusla eyni vaxtda qəbul edilməsi sonuncuların nefrotoksiki effektini gücləndirə bilər. Etorikoksibi bu preparatlardan istənilən biri ilə eyni vaxtda qəbul etdikdə böyrək funksiyalarını yoxlamaq lazımdır.

Farmakokinetik qarşılıqlı təsir
Etorikoksibin digər preparatların farmakokinetikasına təsiri

Litium
QSİƏP böyrəklər vasitəsilə litiumun xaric edilməsini zəiflədir və beləliklə də, qan plazmasında litiumun səviyyəsini artırır. Əgər lazım gələrsə, qanda litiumun səviyyəsini tez-tez yoxlamaq və bu preparatların eyni vaxtda qəbul edildiyi dövrdə, həmçinin QSİƏP-nin qəbulunu dayandırdıqda litiumun dozasında düzəlişlər etmək lazımdır.

Metotreksat
İki tədqiqatda etorikoksibin effekti revmatoid artritin müalicəsi zamanı metotreksatı həftədə bir dəfə 7,5-dən 20 mq-a qədər qəbul edən xəstələrdə 7 gün ərzində gündə bir dəfə olmaqla 60, 90 və 120 mq dozada qəbul edilməsi zamanı öyrənilmişdir. Etorikoksib 60 və 90 mq dozalarda metotreksatın qan plazmasındakı qatılığına və böyrək klirensinə təsir göstərməmişdir. Bir tədqiqatda etorikoksib 120 mq dozada metotreksatın göstəricilərinə təsir göstərməmiş, lakin digər tədqiqatda qan plazmasında etorikoksibin qatılığı 28% yüksəlmiş, metotreksatın böyrək klirensi 13% aşağı düşmüşdür. Etorikoksibi və metotreksatı eyni vaxtda qəbul etdikdə metotreksatın toksiki təsirinin meydana çıxmasına görə müşahidələr aparmaq lazımdır.

Peroral kontraseptivlər
Etorikoksibin 60 mq dozada tərkibində 35 mkq etinilestradiol və 0,5 -dən 1 mq-a qədər noretindron olan peroral kontraseptivlərlə 21 gün ərzində birlikdə qəbul edilməsi etinilestradiolun AUC0-24 göstəricinin 37% artmasına gətirib çıxatmışdır. Etorikoksibin 120 mq dozada yuxarıda göstərilən peroral kontraseptivlərlə birlikdə və ya 12 saatlıq intervalla qəbul edilməsi tarazlıq vəziyyətində etinilestradiolun AUC 0-24 göstəricini 50-60 % artırmışdır. Peroral kontraseptivin seçimi zamanı etorikoksiblə eyni vaxtda qəbul ediləcək etinilestradiolun qatılığının bu cür qalxmasını yadda saxlamaq lazımdır. Etinilestradiolun ekspozisiyasının artması peroral kontraseptivlərin qəbul edilməsilə bağlı olan əlavə reaksiyaların əmələ gəlmə tezliyini artıra bilər (məsələn, risk qrupuna daxil olan qadınlarda venaların tromboemboliyası).

Hormonəvəzedici terapiya
120 mq etorikoksibin 28 gün ərzində hormonəvəzedici preparatlarla, o cümlədən konyuqasiya olunmuş estrogenlərlə (PremarinTM 0,625 mq) birlikdə qəbul edilməsi tarazlıq vəziyyətində konyuqasiya olunmayan estrogenin, ekvilinin və 17-β-estradiolun orta AUC0-24 göstəricini artırır (müvafiq olaraq, 41%, 76% və 22%). Etorikoksibin uzun müddət istifadəsi üçün tövsiyə olunan dozalarının (30, 60 və 90 mq) təsiri öyrənilməmişdir.

Etorikoksib 120 mq dozada, Premarin preparatı ilə monoterapiya ilə müqayisədə, Premarin preparatının estrogen komponentlərinin ekspozisiyasını (AUC0-24) yarıdan çox aşağı salmışdır; Premarinin dozasını 0,625-dən 1,25 mq qədər artırırdılar. Bu cür yüksəlmələrin klinik əhəmiyyəti məlum deyil, etorikoksiblə kombinasiyada isə Premarin preparatının daha yüksək dozaları öyrənilməmişdir. Menopauzadan sonrakı dövrdə etorikoksiblə eyni vaxtda qəbul etdikdə istifadə üçün hormonal preparatı seçərkən estrogenlərin qatılığının bu cür yüksəlməsini nəzərə almaq lazımdır, çünki estrogenlərin ekspozisiyasının yüksəlməsi əvəzedici terapiya zamanı əlavə reaksiyaların əmələ gəlmə riskini artıra bilər.

Prednizon/prednizolon
Preparatlarla qarşılıqlı təsirə həsr olunmuş tədqiqatlarda etorikoksib prednizonun/prednizolonun farmakokinetikasına klinik əhəmiyyətli təsir göstərməmişdir.

Diqoksin
Etorikoksib sağlam könüllü şəxslər tərəfindən 10 gün ərzində gündə 1 dəfə 120 mq dozada qəbul edildikdə tarazlıq vəziyyətində AUC0-24 göstəricisinə və diqoksinin böyrəklər vasitəsilə xaric edilməsinə təsir göstərməmişdir. Diqoksinin Cmax göstəricisinin artması müşahidə edilmişdir (təxminən 33%). Bu cür yüksəlmə, bir qayda olaraq, əksər xəstələr üçün əhəmiyyətli deyil. Lakin etorikoksibi və diqoksini eyni vaxtda qəbul etdikdə diqoksinin toksiki təsirinə görə yüksək riskli xəstələrin vəziyyəti üzərində müşahidə aparmaq lazımdır.

Etorikoksibin sulfotransferazalarla metabolizmə uğrayan preparatlara təsiri
Etorikoksib insan sulfotransferazasının, o cümlədən SULT1E1-in aktivliyinin inhibitorudur, həmçinin qan zərdabında etinilestradiolun qatılığını artıra bilir. Hal-hazırda müxtəlif sulfotransferazaların təsiri haqqında məlumatlar az olduğundan və əksər preparatlar üçün klinik əhəmiyyət hələ də öyrənildiyindən, etorikoksibi əsasən insan sulfotransferazaları vasitəsilə metabolizmə uğrayan digər preparatlarla (məsələn, peroral salbutamol və minoksidil) birlikdə ehtiyatla təyin etmək məqsədəuyğundur.

Etorikoksibin CYP sistemi izofermentləri vasitəsilə metabolizmə uğrayan preparatlara təsiri
İn vitro tədqiqat məlumatlarına əsasən etorikoksib vasitəsilə P450 (CYP) 1A2, 2C9, 2C19, 2D6, 2E1 və 3A4 sitoxromlarının inhibə edilməsi gözlənilmir. Sağlam könüllü şəxslərin iştirakı ilə həyata keçirilən tədqiqatda hər gün 120 mq dozada etorikoksibin qəbul edilməsi qaraciyərin CYP3A4 fermentinin aktivliyinə təsir göstərməmişdir (eritromisinli tənəffüs testinə əsasən müəyyən edilmişdir).

Digər preparatların etorikoksibin farmakokinetikasına təsiri
Etorikokoksibin əsas metabolizm yolu CYP sisteminin fermentlərindən asılıdır. CYP3A4 in vivo etorikokoksibin metabolizminə şərait yaradır. İn vitro tədqiqatlar göstərir ki, CYP2D6, CYP2C9, CYP1A2 və CYP2C19 da əsas metabolizm yolunu kataliz edə bilər, lakin in vivo miqdari xarakteristikalar öyrənilməmişdir.

Ketokonazol
Ketokonazol CYP3A4 güclü inhibitorudur. Sağlam könüllü şəxslər tərəfindən 11 gün ərzində gündə 1 dəfə 400 mq dozada qəbul edildikdə ketokonazol etorikokoksibin birdəfəlik 60 mq dozasının farmakokinetikasına əhəmiyyətli dərəcədə təsir göstərməmişdir (AUC göstəricisinin 43% yüksəlməsi).

Vorikonazol və mikonazol. Peroral vorikonazolun və ya yerli istifadə olunan oral mikonazolun (CYP3A4 güclü inhibitorlar) etorikoksiblə birlikdə istifadəsi, etorikoksibin təsirinin artmasına gətirib çıxartmışdır, lakin dərc edilmiş məlumatlara əsasən klinik cəhətdən əhəmiyyətli hesab edilmir.

Rifampisin
Etorikoksibin və rifampisinin (CYP fermentlərinin güclü induktoru) eyni vaxtda qəbul edilməsi qan plazmasında etorikoksibin qatılığının 65% aşağı düşməsinə gətirib çıxarmışdır. Əgər etorikoksib rifampisinlə eyni vaxtda qəbul edilərsə, bu cür qarşılıqlı təsir simptomların residiv verməsilə müşayiət oluna bilər. Bu məlumatlar dozanın artırılmasını vacib olduğunu bildirdikdə, etorikoksibi hər bir göstəriş üçün göstərilmiş dozalardan yüksək dozalarda qəbul etmək tövsiyə edilmir, çünki rifampisin və etorikoksibin bu cür dozalarda kombinasiya olunmuş şəkildə qəbul edilməsi öyrənilməmişdir.

Antasidlər
Antasid preparatlar etorikoksibin farmakokinetikasına klinik əhəmiyyətli təsir göstərmir.

Hamiləlik və laktasiya dövründə istifadəsi
Hamiləlik. SOG-u inhibə edən digər preparatlar kimi etorikoksib hamiləliyi planlaşdıran qadınlara göstəriş deyil.

Hamiləlik zamanı etorikoksibdən istifadə haqqında klinik məlumatlar yoxdur. Heyvanlar üzərində aparılan tədqiqatlarda reproduktiv toksiklik müşahidə edilmişdir. Qadınlarda hamiləlik zamanı potensial risk məlum deyil. Hamiləliyin sonuncu üçaylığında prostaqlandinlərin sintezini inhibə edən digər preparatlar kimi, etorikoksibin qəbulu uşaqlığın yığıla bilməməsinə və botal axacağının vaxtından əvvəl bağlanmasına gətirib çıxara bilər.

Qeyri-steroid iltihab əleyhinə preparatlar (QSİƏP) qəbul etmiş, hamiləliyin 20-ci həftəsində və ya daha gec olan hamilə qadınlarda dölün böyrəklərinin funksional pozuntusu haqqında məlumat verilmişdir ki, bu da dölətrafı suyun azalmasına gətirib çıxarmışdı (oliqoqidramnion). Bəzi hallarda bu, yenidoğulmuşlarda böyrək funksiyasının pozuntusuna gətirib çıxara bilər. Belə effektlər QSİƏP-la müalicəyə başlayandan sonra yarana bilər; adətən müalicə dayandırıldıqdan sonra çox vaxt oliqoqidramnion keçib gedir.

Hamiləlik zamanı etorikoksibdən istifadə əks göstərişdir. Əgər hamiləlik müalicə dövründə baş verərsə, etorikoksibdən istifadəni dayandırmaq lazımdır.

Laktasiya. Etorikoksibin qadınlarda südə keçib-keçməməsi məlum deyil. Məlumdur ki, siçovullarda preparat südlə xaric olunur. Laktasiya dövründə etorikoksib qəbul edən qadınlar uşaqlarını ana südü ilə qidalandırmamalıdırlar.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Etorikoksib qəbul etdikdə başgicəllənmə, vertiqo və ya yuxululuq əmələ gələn xəstələr avtonəqliyyat vasitələrini və mexanizmləri idarə etməməlidirlər.

İstifadə qaydası və dozası
Böyüklər və 16 yaşdan yuxarı yeniyetmələr üçün Etorikoksibin tövsiyə olunan başlanğıc dozası:

osteoartrit, dismenoreya və dayaq-hərəkət sisteminin xroniki xəstəlikləri: 60 mq, gündə bir dəfə.
revmatoid artrit: 90 mq, gündə bir dəfə.
ankilozan spondilit 90 mq, gündə bir dəfə.
stomatoloji əməliyyatdan sonra və kəskin podaqra ağrılarında: 120 mq, gündə bir dəfə.

Əlavə təsirləri
Ağızda quruluq, dadın pozulması, ağızda yaralar, qəbizlik, meteorizm, iştaha və çəkidə dəyişikliklər, döş qəfəsində ağrı, paresteziya, yorğunluq, qripə bənzər sindrom və mialgiya.

İnfeksiyalar və invaziyalar: tez-tez – alveolyar ostit; bəzən – qastroenterit, yuxarı tənəffüs yollarının infeksiyaları, sidik-ifrazat yollarının infeksiyaları.
Qan və limfa sistemində pozuntular: bəzən – anemiya (əsasən mədə-bağırsaq qanaxması nəticəsində), leykopeniya, trombositopeniya.

İmmun sistemdə pozuntular: bəzən – hiperhəssaslıq reaksiyaları, nadir hallarda – angionevrotik ödem, anafilaktik / anafilaktoid reaksiyalar, o cümlədən şok.
Metabolizm və qidalanma pozuntular: tez-tez – ödemlər/ mayelərin ləngiməsi; bəzən – iştahanın azalması və ya artması, bədən çəkisinin artması.

Psixikada pozuntular: bəzən – həyəcan, depressiya, əqli fəaliyyətin pisləşməsi, hallyusinasiyalar^‡; nadir hallarda – huşun dolaşıqlığı, narahatçılıq.
Sinir sistemində pozuntular: tez-tez – başgicəllənmə, baş ağrısı; bəzən – disgevziya, yuxusuzluq, paresteziya/hipesteziya, yuxululuq; məlum deyil – kəllədaxili qansızma.

Görmədə pozuntular: bəzən – qeyri-aydın görmə, konyunktivit.
Eşitmə orqanlarında və labirintdə pozuntular: bəzən – qulaqlarda küy, vertiqo.

Ürəkdə pozuntular: tez-tez – palpitasiya, aritmiya; bəzən – qulaqcıqların fibrillyasiyası, durğunluq ürək çatışmazlığı, EKQ-də qeyri-spesifik dəyişikliklər, stenokardiya, miokard infarktı, taxikardiya.

Damar sistemində pozuntular: tez-tez – hipertenziya; bəzən – qanın toplanması, insult, beyin qan dövranının tranzitor işemik pozuntuları, hipertonik kriz, vaskulit; məlum deyil – dərin venaların trombozu.

Respirator sistem, döş qəfəsi və orta divar orqanlarında pozuntular: bəzən – öskürək, dispnoye, burundan qanaxmalar; tez-tez – bronxospazm; məlum deyil – ağ ciyər emboliyası.

Mədə-bağırsaq traktında pozuntular: çox tez-tez – abdominal ağrılar; tez-tez qəbizlik, meteorizm, qastrit, mədə qıcqırması/turşu reflyuksu, diareya, dispepsiya/ epiqastral sahədə diskomfort, ürəkbulanma, qusma, ezofagit, ağız boşluğunda yara; bəzən – qarında köp, bağırsaq peristaltikasının xarakterinin dəyişməsi, ağızda quruluq, qastroduodenal yaralar, qastrointestinal perforasiya və qanaxma daxil olmaqla peptik yaralar, qıcıqlanmış bağırsaq sindromu, pankreatit .

Hepatobiliar sistemdə pozuntular: tez-tez – AST səviyyəsinin artması, ALT səviyyəsinin artması; nadir hallarda – hepatit, qaraciyər çatışmazlığı, sarılıq.

Dəri və dərialtı toxumada pozuntular: tez-tez – ekximoz; bəzən – üzdə ödem, qaşınma, səpgi eritema, övrə; nadir hallarda – Stivens-Conson sindromu, toksiki epidermal nekroliz, davamlı dərman eritema.

Skelet-əzələ sistemində, birləşdirici toxumada və sümüklərdə pozuntular: bəzən – əzələlərin spazmı/ qıcolmaları, skelet-əzələ ağrıları/ hərəkətsizliyi.

Böyrək və sidik-ifrazat sistemində pozuntular: bəzən – proteinuriya, qan zərdabında kreatininin səviyyəsinin artması, böyrək funksiyalarının pozulması/böyrək çatışmazlığı.

Ümumi pozuntular və preparatdan istifadə üsulu ilə bağlı olan pozuntular: tez-tez – asteniya/zəiflik, qripəbənzər simptomlar; bəzən – döş qəfəsində ağrılar.

Müayinə: bəzən – qanda sidik cövhəri azotunun səviyyəsinin artması, kreatinfosfokinazanın səviyyəsinin artması, hiperkaliemiya, sidik turşusu səviyyəsinin artması; nadir hallarda – qanda natriumun səviyyəsinin azalması.

Aşağıdakı əlavə reaksiyalar haqqında QSİƏP-dən istifadə zamanı məlumat verilmişdir, buna görə də etorikoksibdən istifadə etdikdə onların əmələ gəlmə ehtimalını istisna etmək olmaz: nefrotoksiklik, o cümlədən interstisial nefrit və nefrotik sindrom.

Doza həddinin aşılması
Klinik tədqiqatlar zamanı etorikoksibin birdəfəlik dozalarda 500 mq-a qədər və ya 21 gün ərzində 150 mq/günə qədər dəfələrlə qəbulu əhəmiyyətli toksik effektlərə səbəb olmamışdır. Əksər hallarda əlavə reaksiyalar haqqında məlumat verilməsə də etorioksibin doza həddinin kəskin aşılması haqqında məlumat verilmişdir. Daha tez-tez rast gələn əlavə reaksiyalar etorikoksibin təhlükəsizlik profili ilə müqayisə olunan olmuşdur (məsələn, MBT-də reaksiyalar, kardiorenal reaksiyalar).

Doza həddinin aşılması zamanı absorbsiya olunmayan preparatın MBT-dən çıxarılması, klinik müşahidənin aparılması və lazım gəldikdə – dəstəkləyici müalicənin təyin edilməsi kimi adi dəstəkləyici tədbirlər görmək məqsədəuyğundur.

Etorikoksib hemodializ zamanı dializ olunmur; preparatın peritoneal dializ zamanı dializ olunması isə məlum deyil.

Buraxılış forması
Hər qutuda 3 alüminium folqa-PVC blister, hər blisterdə 10 tablet içlik vərəqəsi ilə birlikdə qablaşdırılmışdır.

Saxlanma şəraiti
25⁰ C temperaturdan aşağı, qaranlıq, quru və uşaqların əli çatmayan yerdə saxlayın.

Yararlılıq müddəti
2 il.
Yararlıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı / Qeydiyyat vəsiqəsinin sahibi
The ACME Laboratories Ltd., Dhulivita, Dhamrai, Dhaka, Bangladesh Telefon: +88-02-8091051-3
E-Mail: export@acmeglobal.com